Tyson Lopez, director ACF:
ORANJESTAD (AAN)-- Tyson Lopez, Director di Aruba Conservation Foundation, den entrevista cu Matutino DIARIO a señala cu desde aña pasa, ACF a lanza su campaña “Naturaleza ta Papia” cu ta na unda nan ta bishita diferente bario y centronan di bario, pa yega mas cerca posibel di comunidad.
“Asina nos ta duna informacion, intercambia opinion, bay den combersacion cu bario riba e balor y importancia di naturaleza. Nos a haci diferente sesion caba, tocante diferente topico (cada sesion ta un topico), y esun cu nos ta bay tin aworaki enberdad ta ‘yerba di lama’ y esaki ta pa concientiza riba e balor diario di lama. Yerba di lama, tin biaha hendenan ta hay’e vies, pero e tin su importancia den e totalidad di nos naturaleza y bida marino”, señor Lopez a relata.
Yerba di lama, el a reitera, ta un di e espacionan unda cu pisca ta biba. “Bo ta haya nan nace den mangrovenan, ta bay over na yerba di lama, y despues nan ta bay over na coral. Ora nos ta splica cu por ta esaki ta nan basis scol y despues nan ta sigui, pero tin especie cu ta keda specificamente den yerba di lama, por ehemplo calco. Esey ta unda nan ta biba. Y si e cantidad di yerba di lama bira menos y menos, bo ta pone na riesgo e cantidad di pisca, of diferente otro especienan cu ta depende di dje, por ehemplo tortuga tambe. Tortuga ta come e yerba di lama”, director di ACF a señala.
