Entiero conmovedor y rondona pa musica pa legendario Ruben ‘Scorpio’ Garcia

ORANJESTAD (AAN): Diadomingo mainta y siguiendo te atardi, famia, rumannan, primo y primanan, sobrinonan, bisiña, coleganan locutor, miembronan di prensa,

personahenan di Carnaval, oficialnan di Cultura, diferente dignatario, musico, comerciante, y cantantenan di caliber halto a presenta na Royal Funeral Home riba Watty Vos Boulevard, pa asina despedi di e legendario celebridad local, Ruben ‘Scorpio’ Garcia kende a fayece cu 70 aña di edad.

   Y manera a ser spera, un multitud grandi a bin para den rij, comodamente bao di gazebonan, pa asina condoler famia y conocirnan, y despedi di e voz inigualable den radiodifusion na Aruba y Antiyas pa como mitar siglo.

   Ademas di esey, a percura pa diferente musico y DJ local a haya algun minuut pa rindi homenahe na Ruben Garcia.  Por a mira presentacion di Jeon y Upgrade Music, Massive Brassband, Rincon Boyz, Edjean Semeleer y Chris Cross, Grupo di Betico, TBS Brassband, Buleria, y tambe DJ Nutzbeatz, DJ Vibes, DJ Yeimy.

   Por a sinti e tristeza ta reina tanto pafo di e sala di funeraria, como tambe paden  Tur wowo tabata yena cu lagrima.  Varios persona a bin di exterior tambe pa mustra nan honor y tuma despedida di dje.

   Loke ta un consolacion ta cu el a haya un despedida como debe ser, y sigur keto bay DIARIO ta manda palabra di forza na su famia, ruman- y conocirnan.

   Cu Todopoderoso dune un lugar special den Su Reino.  Aruba mes, lo recorda Ruben Garcia pa semper.