Aruba a perde un gran baluarte musical cu fayecimento di Stanley La Cruz

ORANJESTAD (AAN): Diamars siman pasa e informacion tristo a drenta, cu e musico talentoso cu ta ser yama ‘El Caballo Mayor”, esta Jose Stanley La Cruz a fayece.  E tin 78 aña di edad.

   Pa su amigonan e tabata worde yama Stanley of Jo.  Pa bay back cortico riba su historia, Stanley a nace na Aruba y desde 1960 caba e tabata forma parti di e mihor gruponan musical na Aruba.

   E tabata forma parti di “Oruba Sextet” tambe, hunto cu Herman Stephens, Chester Alexander, Joy Kock, Alex Odor, Hector Quilotte.  Nan tabata e banda principal cu tur anochi tabata toca den Aruba Sheraton Hotel.

   El a yega di toca den Brassband tambe!  Na 1976 a hasta forma un “Hotel All Stars Brassband”, y Stanley La Cruz tabata tocando eyden.

   Algo valioso ta e hecho, cu Stanley La Cruz tabata co-fundador di e banda Papito y su Doble Sabor.  Na opinion di Papito Rafael, e ta considera Stanley La Cruz como un di e mihor percussionista cu Aruba a conoce.  Su habilidad tabata fenomenal.

   Stanley La Cruz ta conoci pa hopi hende tambe como empleado di Postkantoor. 

   Entiero di El Caballo Mayor lo bay ta Diamars atardi, 8 di November 2022.  Na famia y amigonan, DIARIO ta manda palabranan di condolencia.