Como 53 hoben a ricibi nan Sacramento di Confirmacion na Paradera

ORANJESTAD (AAN): Diasabra mainta, un grupo di 53 hoben adolescente a reuni na Misa Santa Filomena na Paradera, pa asina dilanti Obispo Mgr. Secco nan ricibi nan sacramento di Confirmacion.

   Cada uno tabata presente sea cu nan Padrino y Madrina, y na entrada di Misa nan a wordo ricibi pa Pastoor Toty y tambe Obispo.  DIARIO a nota cu e hobennan tabata hopi alegre, yen debocion, y tabata cla pa sigui cu e siguiente paso di ricibi e Sacramento.

   Misa mes tabata completamente yen di famia y amigonan cu a bay mira esaki, y e ceremonia riba su mes, cu e Santo Sacrificio di Misa lo keda como un bunita recuerdo pa cada uno di nan. Na final di e Misa y Sacramento, e hobennan a haya chens di para riba altar hunto cu Obispo Mgr. Secco y Pastoor Toty pa saca un potret hunto.