Enseñansa pa Empleo cu cursonan hotelero disponibel pa comunidad

Ministro a atende develo di logo nobo

ORANJESTAD (AAN): Dialuna mainta Minister di Turismo y Salud Publico sr. Dangui Oduber a atende un conferencia di prensa unda a celebra e desvelo di e logo nobo y tambe e renobacion moderno di e edificio di Enseñansa pa Empleo (EPE).  

   Enseñansa pa Empleo a worde funda na aña 1988 y a bira un centro di enseñansa pa e industria di hotelero y turismo. Turismo ta keda e pilar principal di nos economia y Enseñansa pa Empleo ta keda un instituto importante cuta ofrece cursonan basa riba e necesidad di e mercado laboral y trece educacion popular riba un nivel alcansabel pa tur hende.  

   E tabata un mainta ameno caminda Minister Oduber a ricibi un “tour” di e diferente cursonan cu ta worde duna. Awendia Enseñanza pa Empleo ta ofrece un variedad di cursonan riba diferente nivel manera servicio na cliente, bartending, waiter/waitress y esaki ta crea oportunidad pa nos comunidad haya mas conocemento pa por brinda e miho servicio na nos bishitantenan y yuda mantene nos industria di turismo y economia fuerte.  

   Na aña 2022 tabata tin 600 persona cu a sigui cursonan y e aña aki mas di 1600. Danki na crecemento di turismo tin cuponan di trabao nobo.

   Minister Oduber ta contento cu Enseñansa pa Empleo lo habri nan porta na e disctricto di San Nicolaas pa 2024 y asina percurpa pa mas ciudadano por haya acceso na enseñansa pa asina por sigui brinda e miho servicio na nos turistanan. 

Finalmente Minister Dangui Oduber ta gradici prome Minister Evelyn Wever-Croes  y colega Minister Glenbert Croes y ademas tur stakeholders pa logra haci esaki posibel. 

   Masha Pabien na e team di Enseñansa pa Empleo pa boso bon trabao pa asina por sigui ofrece mas cursonan y aumenta oportunidadnan na e pueblo di Aruba.