E simbolonan usa den logo nobo di Reclassering tin hopi nificacion profundo

A incorpora parti di e logo bieu den dje

ORANJESTAD (AAN): Despues di 60 aña, Stichting Reclassering a lanza un logo nobo.  Esaki a socede durante un ceremonia cortico Diabierna atardi dilanti nan sede den Caya Ernesto Petronia.

   Despues di e develo, e miembro di directiva Ebby Schwengle a splica kico e emblemanan den e logo nobo ta nifica.

   E logo nobo ta contene diferente elemento.  Tur e elementonan aki ta trata na conecta y integra, cu ta simboliza e proceso di integracion di e clientenan di Reclassering den comunidad.  E cinco elementonan ta:  Tres rectangulo, e liñanan, dos man, e colornan, y e nomber di e organizacion.

   E rectangulonan ta representa Reclassering, mientras e rectangulo berde ta refleha e clientenan cu ta ricibi e guia.  E rectangulonan ta topa otro y ta forma un elemento nobo cu Reclassering ta traha den dje, mientras cu e espacio den e lineanan ta nifica cu cada ciclos negativo por wordo interumpi pa un structura positivo y poderoso.  Partinan habri cu ta forma rond di e rectangulonan ta refleha e cooperacion entre Reclassering y diferente instancianan den comunidad.

   E dos mannan ta un simbolo pa guia, aceptacion y compensacion cu ta alcanzando otro riba mesun haltura, simbolizando cu e reintegracion exitoso mester bin di ambos banda, esta di Reclassering y e cliente.  Alavez cu tur dos partido ta igual den e proceso di reintegracion.

   Tin di menciona cu e mannan ta unico elemento cu ta wordo incorpora di e logo bieu.  E tin keto bay e nificacion di gratitud pa e trabao y esfuerzonan y e desaroyo di Reclassering desde aña 1961.

   E diferente colornan ta un refleho di e diversidad di clientenan di Reclassering, esta background, educacion, y e status den comunidad.  Pero tambe e aspecto y accesibilidad di e trabao di Reclassering.  E color blauw-scur ta simboliza confianza.