ORANJESTAD (AAN) – Minister Dangui Oduber, titular di Turismo y Salud, a hiba palabra den conferencia di prensa, relaciona cu firmamento di un acuerdo entre Gobierno y APA,
pa Polis Maritimo por traha den un edificio completamente renova, pa nan eherce nan trabao dignamente.
Minister Oduber a anuncia cu den cooperacion entre e Ministerionan di Turismo, Husticia, Infrastructura, Economia, y tambe Aruba Ports Authority (APA), a yega na un bon palabracion pa haci un bunita inversion pa mehora e edificio Marpol, ocupa pa Polis Maritimo. “Pa hopi tempo nan no tabata tin un bon localidad pa labora, pa nan haci nan trabao di suma importancia, pa seguridad di nos turismo, pa nan seguridad riba nos Puerto, pa nos cumplimento di nos ISPS Code (International Ship Facility Security Code), kiermen, e inversion aki ta hopi, hopi importante”, Minister Oduber a declara.
El a agrega cu na momento cu el a drenta gobierno, el a drenta den combersacion cu Ministerio di Husticia, con nan por yega na palabracionnan concreto pa haci un inversion pa upgrade e facilidad aki, pa Polis Maritimo por tin un bon oficina pa eherce nan trabao.
Minister Oduber a reitera cu pa hopi tempo nan no tabata tin un oficina manera nan tin mester, unda gobierno a decreta aña 2022 como un aña di hopi inversion, y nan ta cumpli. “Esaki ta un inversion cuantioso pa tin un bunita edificio pa Polis Maritimo por eherce nan trabaonan. Mi kier gradici Minister Tjon, APA, y tambe Aruba Hospitality Security Foundation pa pone e fondonan disponible pa e proyecto aki, y pa Polis Maritimo aki seis luna por tin un bunita edificio pa nan haci nan excelente trabao, manera nan a bin ta haciendo pa pais Aruba, despues cu e proceso di renovacion tuma lugar”, Minister Dangui Oduber a conclui.
