ORANJESTAD (AAN) – Durante e reunion publico den Parlamento, Diahuebs di e siman aki, a wordo trata e Ley di LIM (Landsverordening Instelling Ministerie), cu ta Institui e ministerionan.
Prome Minister Wever-Croes, dirigiendo na Presidente di Staten, mr. Edgard Vrolijk, a describi e proceso cu a culmina den e Ley di LIM, cu tabata den tratamento e ora ey.
E mandatario a expresa cu esaki ta un ley cu ta bin, regularmente, den Parlamento, y el a bisa cu poco tempo pasa tabata tin un cambio den e ley ora cu nan a bin cu cierto cambionan, pero ta mas tanto un biaha cada cuater aña, e ley aki ta bin Parlamento pa un revision.
“E ta e Ley con bo ta institui bo ministerionan y su aprobacion di Parlamento, ta necesario pa e ley. Mi duna un comparacion cu, por ehemplo, Hulanda. Na Hulanda, e ministeriornan ta wordo institui door di un Landsbesluit; un decreto, no un ley di Parlamento. Aki na Aruba nos tine na nivel di Parlamento, pasobra nos ta kere importante pa nos tin Parlamento su input riba esaki, pa Parlamento ta esun cu ta aprobe. Si Parlamento ta desea pa cambie por ta na estilo di Hulanda of otro sistema, semper nos por delibera riba esey, y Parlamento por duna tambe, iniciativanan riba dje”, Minister Presidente a señala.
E mandatario a agrega cu e ley di instalacion di ministerionan por ta diferente na otro paisnan, y na Aruba e ta semper despues di formacion di un gobierno.
“Manera ta conoci gobierno por wordo forma sea pa un partido so, manera tabata e caso, por ehemplo, na 2001, 2005, 2009, 2013, of por ta un gobierno cu ta consisti di un coalicion di un, dos, of mas partido. Esey tabata e caso na 2017 y na 2021. Y esaki ta decision di pueblo e ta, y como gobernante, parlamentario y politiconan, nos tin cu respeta decision di pueblo y biba cu e consecuencianan di decision di pueblo y nos tin cu percura pa carga e responsabilidad cu pueblo ta pidi nos”, Minister Presidente a expresa.
El a agrega cu ora a haya e resultado di eleccion di 2021, y te ainda ora e ta mira e cantidad di votonan y cu su persona a saca 7.518 voto, e ta yene cu un sentimento di hopi gratitud, pa e confianza cu e comunidad a pone den su persona, di e forma aki.
Y ta trece pa su persona mas responsabilidad tambe, pasobra e ta mira cu pueblo a sostene su maneho. A bin cierto cambionan cu ta expresa, entre otro, den e acuerdonan di gobernacion cu a cera entre e Partidonan MEP y RAIZ, y den e Ley di LIM a institui e ministerionan. Den otro articulo ta sigui elabora riba e relato di Prome Minister den Parlamento.
