E siete punto di strategia di salida di Gobierno ta pa logra elimina tur medida

Minister Tjon:  --- * mester percura pa e situacion keda bao di control

ORANJESTAD (AAN) – Diahuebs mainta a tuma lugar e conferencia di prensa di gobierno, den cual a hiba palabra Minister di Husticia y Asunto Social, Rocco Tjon y, hunto cune, Crisis Team.

Ademas di e dignatario, a hiba palabra e funcionarionan di Departamento di Salud (DVG) Sharline Koolman, Hefe di DBZ, Gerreth Tromp, Epidemiologo; CEO di Oficina di Turismo (ATA) Ronella Croes, y Alto Comisario Suplente di Cuerpo di Polis (KPA), Irma Gordon.

E meta di e conferencia di prensa aki ta pa duna un update di e situacion di Covid-19 na Aruba.

Minister Rocco Tjon a cuminza, bisando cu e ta haya hopi importante pa keda brinda comunidad informacion, mirando cu 21 di Januari gobierno a anuncia e strategia di salida (encuanto e pandemia) y esey ta keda e punto di salida di parti di gobierno.

E mandatario a indica cu e ultimo di e siete puntonan di e strategia di salida, ta pa elimina tur medida, y eynan gobierno kier yega; pero pa yega eynan mester percura pa e situacion keda bao di control.

Minister Tjon a duna di conoce cu pa e diahuebs aki tabata tin 356 caso activo, y gobierno ta satisfecho cu esaki. Tjon a bisa cu si compara e cifra aki cu dos siman pasa cu tabata tin 2.800 caso, y siman pasa tabata tin ainda 1.100 caso activo.

Locual, den concepto di gobierno tambe ta bon, ta cu e capacidad na hospital te ainda ta bao di control. E mandatario ta lamenta cu toch tin algun persona cu a fayece debi na Covid-19 y esey ta keda algo lamentable, y gobierno ta bolbe enfatiza riba un aspecto importante, pa comunidad keda cuida y mantene su mes na e reglanan vigente.

Minister Roco Tjon a agrega cu siman pasa su colega Minister di Salud Dangui Oduber, a anuncia e strategia di salida pero, toch, e kier a bolbe enfatiza riba e puntonan aki pa brinda informacion.

E strategia di salida ta hopi importante pa expande e capacidad na ICU (Unidad di Cuido Intensivo) y nan ta trahando riba esaki. Tambe e strategia ta encera cambia e maneho pa loke ta e testing na aeropuerto, pa local y turistanan. Enfoca riba e booster (vacuna di refuerzo), y reinforza DVG pa asina nan por yega na e ultimo punto cu ta eliminacion di tur medida.

Tjon a bisa cu ta importante pa keda stress cu te ainda no a kita ningun regla ni medida, pero mester cumpli cu e reglanan vigente (protocol), coopera cu e taskforce, y tambe pa di e forma ey no recarga Cuerpo Policial cu mester mantene orden publico.

Finalmente el a reitera cu ta hopi importante pa nos poblacion keda atene su mes na e reglanan, pa mas lihe por flexibiliza, manera a indica dia 21 di Januari cu a anuncia e strategia di salida y a flexibiliza, y dentro di poco si e situacion sigui di e forma aki lo sigui flexibiliza tambe e diferente medidanan.