ATA lo ta cerando e prome cuartal di 2022, como un kwartaal tipifica pa e impacto di omicron

Ronella Croes, CEO di ATA:   --- * Y cu presencia di covid-19 ainda

ORANJESTAD (AAN) – Ronella Croes, CEO di Aruba Tourism Authority (ATA), a hiba palabra durante e conferencia di prensa di gobierno, relaciona cu e update tocante Covid-19.

Na prome lugar, Director di ATA a duna un actualizacion di loke ta e situacion di turismo na Aruba, no obstante cu ATA a saca diferente informacion pa loke ta e tema aki caba.

“Pero un total di 806.551 bishitante a cera aña 2021. Nos a cera pues, aña 2021 cu un grado di recuperacion di 72%, compara cu 2019.

Mester bisa si cu locual ta evidente ta cu omicron a haci su entrada y esaki tabata un impacto pa e luna di December. Pa ta mas exacto, e ultimo dos simannan di December, nos a mira cu nos a perde 12% di locual nos tabata tin proyecta pa e luna di December aña pasa. Nos a mira cu den lapso di dos siman, nos a perde, toch, un cantidad significante di bishitantenan. Nos sa cu e impacto aki a continua den luna di Januari y kico mi por bisa te aworaki, ta cu conforme cu loke nos a proyecta pa e luna di Januari, cu lo a indica di duna un inicio di aña, toch, hopi positivo pa nos turismo, lamentablemente nos ta mira cu nos ta proyectando awo, cu nos por a perde rond di 40 mil bishitante, den e luna aki”, Ronella Croes, CEO di ATA a señala.

El a agrega cu esaki ta basta significante, y si berdad esaki ta e caso, kiermen cu ora cera e luna di Januari aki, ATA lo ta informando cu nan lo a cera cu un total di mas of menos 60 mil bishitante.

“Algo cu ta hopi inusual y, principalmente, mester tene na cuenta cu ta, netamente, e aña aki nos a indica cu nos ta iniciando e aña na un manera fuerte, pues papiando di temporada halto”, CEO Ronella Croes a señala.

Fuera di Januari, ATA ta spera di por sigui mira e impacto di omicron, pero na un nivel mas leve den e lunanan di Februari y Maart. “Pues, como tal nos lo ta cerando e prome kwartaal di e aña aki toch, como un cuartal cu ta tipifica pa e impacto di omicron y ainda e presencia di covid-19 cu, un biaha mas, inesperadamente, a stroba planes y proyeccionnan cu nos tabata tin”, Ronella Croes, director di ATA a subraya.