E "Hangua Nacional di Vacunacion" ta marca 64%

ORANJESTAD (AAN):  E cifranan di vacunacion ta sigui subi y por constata segun cifranan di Departamento di Salud cu te cu diasabra 29 di Mei, 62,914 persona a vacuna.

A haya e prome dosis 12,170 persona y 50,744 a haya tur dos dosis.

Den total a aplica 113,658 vacuna.

Aruba ta sigui vacuna, cual ta hopi importante pa nos recuperacion!

Corda cu pa nos sigui cuida nos mes y otro, e miho forma ta pa vacuna. 

E "Hangua Nacional di Vacunacion" ta marca 64%, cada dia nos ta mas cerca di e meta di e 85%, pa por normalisa bida mas tanto cu ta posibel y recupera...ban 'move on'!

Vacuna ta un acto di solidaridad y responsabilidad conhunto. Niun por keda atras.