ORANJESTAD (AAN): Un tiki bon noticia for di Topeka (Kansas) na Merca, ta cu un ciudadano a gana bon placa cu un wega di raspa di Kansas Lottery, y e kier usa parti di e placa pa bin pasa vakantie na Aruba.
Esey ta loke e dama Kristi Smith a bisa ora cu el a bay busca su check di US$ 20.000 cu el a gana.
El a gana e placa hungando e wega di raspa di $2 di ‘Double Bonus Crossword Game’, cu el a cumpra na un tienda.
“For di tempo cu mi tin memoria, semper mi tabata kier a bishita Aruba,” Kristi a bisa ora cu el a ricibi su premio. “Ademas di e vakantie di mi soño na beach, mi lo pone e resto di placa tambe den un cuenta di spaar.”
E relato ey ta loke Kansas Lottery a manda den un boletin pa tur medio di prensa. Pues durante siman, ta tur hende na Kansas a haya sa cu tin un habitante mey-mey di nan cu di hopi tempo tabata anhela un vakantie pa Aruba.
Kristi Smith ta un persona cu gusta hunga loteria, y el a bisa cu su premio gordo aki a bin net despues cu el a tuma un paro di 3 luna di hunga wega di Double Bonus Crossword, y tabata hunga otro wega.
El a bisa cu el a usa su ganashi di e otro weganan ey pa siman pasa cumpra ticketnan di raspa di Double Bonus Crossword Game, di cual uno tabata gran ganador.
“Mi a pone e ticketnan den mi tas, a core bay cas, y despues mi a lubida completamente riba nan,” Kristi a bisa. “No ta te cu e siguiente mainta cu mi ta corda cu mi tin e ticketnan di raspa den mi tas. Mi a sinta y raspa nan, y e ora mi a realiza ta con hopi placa mi a gana!”
Su ruman muher, esta Kari Brown, den pasado a yega di gana $25.000 tambe cu wega di Kansas Lottery cu tabata pasa na TV.
“Kizas esaki lo cuminza cu un tradicion nobo di famia di gana cu Kansas Lottery,” Kristi a bisa. “Kizas mi Mama lo bay ta e siguiente ganador.”
Kristi Smith no a divulga pa ki tempo e tin pensa di bin tuma su vakantie na Aruba.
