E Arubiano Productions & Media no ta sospechoso den Caso Diamente

ORANJESTAD (AAN) – Farrah Boekhoudt, director di e compania “E Arubiano Productions & Media” a duna su banda di medaya relaciona cu e inval

cu a tuma lugar na su residencia den cuadro di e caso “Diamante”, unda e ta mustra cu ni e compania y su persona ta envolvi den dje.

            Boekhoudt a declara na Mesa di Redaccion cu e inval a tuma lugar na Papayastraat, Diabierna mainta, pero nan a bay dos caminda; e otro ta un agencia na Venezuelastraat.

Farrah a duna di conoce: “E ta relaciona cu investigacion di e Caso Diamante. Autoridadnan ta en busca di evidencia di e sospecho cu tin contra Alan Howell y Jacky van Putten, di Stichting Hunto nos Por.

            Durante cu nan tabata maneha e fundacion, nan tabata haci uso di diferente servicio di persona of compania, entre nan ‘E Arubiano Productions & Media’. Como proveedor di e servicio, mescos cu tur otro cu a haci esaki na e fundacion, lo a haya bishita di autoridadnan den cuadro di e investigacion andando.

            Den e caso specifico aki, autoridadnan tabata en busca di e invoicenan di tur e trabaonan brinda. Nan kier a haya sa cual trabaonan a wordo paga caba y cual invoicenan ta habri. E bishita di autoridadnan tabata specificamente, en busca di prueba di dos sospechoso y no contra ‘E Arubiano Productions & Media’, y tampoco mi persona, Farrah Boekhoudt.

            Gerencia di E Arubiano Productions & Media a coopera y a entrega tur carta di administracion cu ta regarda e tema aki di e caso Diamante.

            E autoridadnan a trata mi bon, e cooperacion a bay mutuo y e investigacion lo determina riba e caso di e sospechosonan. Lamentablemente, mi a tuma nota di otro medio di comunicacion, cu manera nan ta conoci di no duna e informacion corecto na comunidad di Aruba, perhudicando ciudadanonan, entre otro companianan local, cu nan insinuacionnan falso. Pa basta tempo caba e medio aki ta mal informa y mal educa comunidad riba diferente tipo di caso, entre otro e caso aki, cu no tin nada di haber cu tur loke nan a papia.

            E Arubiano Productions & Media ta lamenta e nivel cu e supuesto periodismo di e medio ey, ta eherce. Mi conseho ta, abo como ciudadano ta scoge e medio pa duna bo informacion y educa bo. Asina un comunidad ta crece y ta keda bon informa. Abo, como ciudadano ta e persona y/of comerciante cu tin e poder di por apoya y sostene un media di nivel of no di nivel. E cambio di mentalidad, di abo como ciudadano y di e futuro generacion ta den bo man. Un pais bon informa ta un pais fuerte para riba su pia. Fake news y noticianan di manipulacion y teatro no ta un nivel periodistico y no ta un search di noticia cu bo por confia”, Farrah Boekhoudt a conclui.

            Boekhoudt a presenta un documento unda e ta indica cu esey ta prueba cu “E Arubiano Productions & Media” y tampoco Farrah Boekhoudt  ta sospechoso di e Caso Diamante.