Dianan 15,17 y 17 September aki: - ORANJESTAD (AAN) – Federacion di Trahadornan di Aruba (FTA), a yama un conferencia di prensa, Diabierna mainta,
cu a tuma lugar na Hyatt Place, y a conta cu participacion di señor Hubert Dirks, Presidente y mr. Jose Figaroa, abogado di e sindicato.
Hubert Dirksz, a cuminza pa bisa cu e rueda di prensa aki, tin e meta di informa cu e di 24 Congreso Statutario di FTA, lo tuma lugar na Hyatt Place mes.
Hubert Dirksz a splica cu FTA ta considera cada tres aña, ora nan yega na e fecha cu mester organiza nan Congreso, cu esaki ta algo hopi importante y aworaki e tin un extra importancia den un momento di crisis.
“Pero ta momentonan unda nos ta lusa nos mes; nos ta evalua profundamente, kico ta e situacion di e clase trahador, principalmente nos miembronan, y no solamente e momento actual, sino kico ta e perspectivanan y kico ta nan futuro. Den e caso aki, dianan 15, 16 y 17 nos tin e actividad aki”, e presidente di FTA a menciona.
El a informa cu Diaranzon 15 di September anochi, lo tin un Conferencia y Diahuebs 16 y Diabierna 17, FTA su Congreso ta tuma lugar, cu tur e delegadonan cu ta mas of menos 90, di tur e sectornan y empresanan cu FTA ta representa nan trahadornan.
“Den e caso aki, nos lo evalua, discuti y trata tur e dolornan y problemanan, deseo y necesidadnan cu FTA tin, riba tur e terenonan; pa cada empresa, cada sector, comisionnan, kehonan cu nos ta representa, situacionnan general, etc. Y caminda cu tin 90 delegado discutiendo riba e mesun temanan nos ta considera un ‘high light’, pa nos por anuncia pa comunidad, y demostra cu FTA ta un sindicato serio, y cu nos ta haci nos best pa tur e dificultadnan cu por tin, nos ta trata di cumpli miho posible pa e trahador, su famia; y pa nos miembronan ta bon representa, unda cu nan problemanan ta worde atendi y nan tin un progreso, sea den CAOnan, cu nos por logra, y tambe un miho calidad di bida pa nan, pa medio di CAO, pero tambe manteniendo bon relacion cu dunadornan di trabao y caminda cu nos por influencia cambionan den ley, pa nos por asina garantiza un miho futuro pa e clase trahador”, Hubert Dirksz a expresa.
Seguidamente, Dirksz a felicita tur e miembronan y delegadonan di FTA, cu den su 57 aña di existencia ta cumpliendo cu su Congresonan, sagradamente. “Considerando esaki, semper nos tin invitadonan di pafo y local; nos ta mantene nos conferencia cada tres aña y esaki nos ta haci e biaha aki tambe”, Hubert Dirksz, presidente di FTA a señala.
