Mayornan angustia: - ORANJESTAD (AAN) – Un biaha mas algun mayor a tuma contacto cu Mesa di Redaccion, cu e preocupacion cu otro scol a cera su porta, Diabierna mainta, debi cu varios alumno a bin scol cu sintomanan cu por ta covid-19.
E scol aki ta situa den area tiki pabao di Seroe Biento y ta worde bishita pa mucha biba den e vecindario, pero tambe na Santa Cruz. Mayornan ta puntra kico ta pasando cu e control na scol.
Algun mayor cu ta concientiza nan yiunan pa no kita e tapaboca den klas y, cu si ta posible use pafo di klas tambe, of aleha hopi di grupo den ora di pause pa kita e mondkapje y hala rosea trankil; pero ta obvio cu no tur mayor ta haci esaki pasobra yen di alumno ta den klas sin ningun sorto di tapaboca, siendo cu gobierno a bolbe introduci uso di tapaboca paden di tur localidad (logica ta bisa cu scol tambe ta parti di tur localidad), y tin maestronan cu tampoco ta use, corda controla nan alumnonan.
Mester corda cu e gran mayoria di alumno di scol basico tin menos cu 12 aña di edad, kiermen nan no por haya vacuna ainda. Y ta un obligacion di scolnan pa tuma control. Ademas, nan no tin e hand- sanitizer mas na porta di cada klas, manera tabata e caso prome. Mayornan ta angustia si, pasobra tur caminda di mundo Delta ta mandando hospital na cantidad di muchanan den edad escolar, y te hasta mas chikito.
Wak e noticianan for di Merca, con dificil y doloroso e situacion ta. Hasta un di e señoranan a comenta cu e tin un amiga na Costa Rica, cu via whatsapp a mande un mensahe unda cu hopi tristeza a bise cu den su bario a muri un mucha di un aña y mey y otro di 5 aña, pa motibo di e variante Delta. Ohala, na Aruba lo no yega di pasa algo asina, pesey mester cuida nos muchanan lo miho posible.
Pero no solamente ta cuestion cu scol tin cu percura pa e seguridad di e alumnonan encuanto covid-19. Mayornan tin sigur e responsabilidad di mas grandi. Nan no mester manda nan yiunan scol si nan tin nanishi tapa, hopi slijm, tosamento seco, keintura, dolor di curpa, cu ta e sintomanan cu cual e muchanan ta bayendo scol. Si e virus ta sigui plama den nos poblacion infantil, pa motibo cu mayornan ta laga nan yiunan bay scol cu sintomanan y nan ta pega otro (sin descarta cu por pase pa maestronan tambe), lo mester bin un boet pa e mayornan aki. Asina un mayor a señala, y cu su opinion DIARIO ta conclui e articulo aki.
