DTI ta observa e Luna di Seguridad y Salud na pia di trabao y ya a cuminza cu  control riba gas comercial

Richella Dorothal, director:

ORANJESTAD (AAN) – Richella Dorothal, director di DTI, den entrevista cu DIARIO a comenta cu den cuadro di Luna di Seguridad y Salud na pia di trabao, DTI ya caba a cuminza cu mas control riba e sistema di instalacion di gas comercial.

E dama a menciona cu a base di ILO (International Labor Organization) dia 28 di April ta conmemora esaki como “A safe and healthy work environment” y esaki ta e parti cu DTI ta haci concientizacion, riba diferente tema di loke DTI ta eherciendo e luna aki, como trabaonan.

Nan ta bezig cu e parti di instalacion di gas comercial pa e parti di keuring, y nan ta bay duna informacion tambe encuanto e procedurenan cu mester tene cuenta cu nan y locual DTI ta para pe tambe.

El a splica cu gas comercial mester haya control ora ta trata di un restaurant, por ehemplo, ora cu e ta habri nobo mester zorg pa e keuring. Cada cinco aña mester haci peticion pa un gas keuring tuma

lugar. Director di DTI a indica cu hopi biaha ta sosode cu e restaurantnan un bez cu a wordo estableci, y tin nan añanan habri, esnan concerni no ta haci e peticion pa keuring y pesey, aworaki, DTI ta partiendo carta di control na restaurant y hotel, pa esnan cu nan gas keuring a caduca.

Tin medidanan pa esnan cu no ta cumpli cu reglanan y hopi biaha DTI ta bay den combersacion cu esnan responsable y informa nan pa “schakel” na nan instalado conoci door di DTI tambe pa haci e proceso, y si ta un situacion hopi peligroso nan lo tin cu cera e parti di instalacion pa un momento pa laga nan haci e proceso adecua, y duna e posibilidad pa haci e proceso.

Durante e luna aki, DTI lo duna informacion na pueblo tocante kico tur nan ta haci, ya cu nan ta wordo asocia solamente cu keurmento di auto, pero nan ta hopi mas cu esaki. Dorothal a señala cu nan tin un total di siete diferente afdeling y pesey nan lo duna informacion tocante e tiponan di keuring cu nan ta duna.