Juffrouw Emilaine Giel ta splica:
ORANJESTAD (AAN)—Un total di diesun docente a logra obtene nan titulo di “Master of Science in Education” (MSE). Na Harbour House den waf di Playa, tabata tin un momento pa honra e 11 docentenan aki, unda nan tabata tin un “Capstone Fair” cu ta nifica e finalizacion di dos aña di estudio pa obtene nan Master’s Degree, den Ciencia en Educacion. Ta bon pa menciona cu esaki ta un programa di colaboracion entre Wayne State College (situa na Nebraska), Instituto Pedagogico Aruba (IPA), y Gobierno di Aruba.
Juffrouw Emilaine Giel, kinder coach y actualmente docente di Klas 1, na Scol Basico Washington, a splica den un entrevista cu DIARIO tocante nan “Capstone Fair”.
Juffrouw Emilaine a splica cu den e “Capstone” aki, nan a representa e cinco pilarnan y conceptonan special, cu nan a haya durante e dos añanan di estudio, y cu nan a pone den practica tambe.
Juffrouw Emilaine a comenta cu durante e dos añanan aki di estudio, el a siña wak cosnan for di diferente perspectiva, mirando cu nan ta un grupo hopi diverso si maestronan di scol basico, nan cabesantenan, maestronan di scol secundario, y hasta guia di Departamento di Enseñanza.
“Eigenlijk e ta mustra bo un otro perspectiva di enseñanza den su totalidad, no solamente pa bo sa con bo coleganan ta wak cosnan, pero tambe ta pone bo para keto un rato y pensa cu nos tin hopi cambio pa bay haci den nos enseñanza, y esaki ta bay ta e prome stap pa e cambionan cu mester bin”, Juffrouw Giel a señala. El a agrega cu e ta hopi contento cu e logro y gradici pa e oportunidad cu e 11 maestronan a haya. Nan ta hopi orguyoso di nan mes y tambe ta stimula otronan cu tin interes pa sigui e estudio aki, pa nan aplica manera cu nan haya chens.
{gallery}Diesun docente a obtene nan titulo di -Master of Science in Education- (MSE){/gallery}
