ORANJESTAD (AAN): Recientemente, Minister Endy Croes a reuni cu Sr. Gildward Maduro, kende ta e persona encarga cu e Proyecto di Data.
A base di recomendacion uno di e Doorlichting Rapport a inicia e proyecto aki den e luna di april di aña 2022. Sr. Maduro ta trahando riba e sistema di Leerlingvolgsysteem (LVS) pa tur scol di Dienst Publieke Scholen (DPS) na Aruba y conecta tur riba un solo sistema via ‘cloud’.
Manera ta conoci, algun directiva di scol e.o. Stichting Katholiek Onderwijs Aruba (SKOA) tin e sistema LVS, pero esaki no ta conecta cu sistema di Gobierno di Aruba ainda. Den e caso di DPS, tin algun scol cu tin un sistema via “cloud”, pero hopi cu no tin ainda.
Pues den cuadro di esaki, a contrata Sr. Maduro pa pone tur 20 scol di DPS riba un solo sistema. Durante e reunion aki, Sr. Maduro a trece un “update” di e trabao cu e ta haciendo y a informa cu pa fin di mei di e aña aki mayoria di e scolnan di DPS lo tin un sistema via ”cloud”.
Despues di esaki, ta prepara pa e siguiente stap cu ta pa entrega e data di tur e “schoolbesturen” na Departamento di Enseñansa pa asina tur 85 scol na Aruba ta riba un solo sistema, esta ‘Open Emis’. Pues, un bon reunion y riba un bon caminda pa e mehoracion di enseñansa di Aruba den su totalidad.
