Dia 10 di December e siguiente edicion di Ban Caya lo tuma lugar den Bario di Piedra Plat

Daniel Tecklenborg di CEDE Aruba ta anuncia:

ORANJESTAD (AAN)—Den Centro Famia Piedra Plat, CEDE Aruba a tene un conferencia di prensa, den cual Daniel Tecklenborg, director, a hiba palabra.

Tabata presente tambe William Erasmus di IBiSA, y den e rueda di prensa tocante Barionan Unico, a informa tocante e siguiente edicion di Ban Caya.

Tecklenborg a indica cu pueblo ta na haltura y por a ripara cu nan a bin cu e prome Ban Caya, na Noord.

“E idea di Ban Caya ta trece hunto organizacionnan di e bario. Nan ta cera caminda y crea espacio unda famianan por bin hunto. Mucha, hoben, adulto y adultonan mayor por participa den diferente actividad, entre otro, deporte riba caminda, pero tambe actividadnan cultural y recreativo. Na Noord e actividad aki a tuma lugar na September ultimo, y el a conta cu mas di cinco mil persona, unda habitantenan y organizacionnan di Noord a bin hunto.

“E tabata un bunita experiencia y a base di esaki, nos a dicidi di continua cu e programa Ban Caya. Aworaki nos ta bay haci’e dia 10 di December, den Bario di Piedra Plat, e ‘Christmas Edition’. Nos kier trece e sentimento di Pasco riba caminda, pero claro, nos kier keda cu e programanan: deportivo, social-cultural, etc. Nos a acerca hopi organizacion di Paradera Piedra Plat, y esey ta un momento tambe unda hendenan por ser conoci cu otro. Famia, bisiña, pero tambe organizacionnan por conecta cu otro, anto despues por traha plannan pa futuro. Nos ta kere den e acogida social den e bario”, Tecklenborg a relata.

El a reitera cu e evento lo tuma lugar Diadomingo 10 di December di 4’or di atardi pa 8’or di anochi. Lo bay tin health street tambe na unda lo tin hopi posibilidad di wordo informa ampliamente pa bo salud. Y na final, Centro di Famia Piedra Plat lo haci un yamada na full e bario pa join esaki.