Dahariana Evertsz, Health Promotion DVG:
*Por ehemplo haci informacion accesibel
ORANJESTAD (AAN) — Dahariana Evertsz, Hoofd di Health Promotion di Departamento di Salud Publico, a señala den entrevista cu DIARIO, cu como Departamento di Salud Publico nan tin un responsabilidad cu nos comunidad.
“Mi afdeling ta enfoca mas tanto den e parti di Health Promotion, di prevencion, y nos ta haci esaki den colaboracion cu nos beleid medewerkernan. Tur cos riba prevencion nos ta wak kico ta pasando. Esaki no solamente cu e organizacion aki, pero tur otro, y nos ta haya cu ta un tremendo iniciativa tambe, pa e Comite aki cu ta consisti di cinco diferente organizacion, con nan kier a traha riba un proyecto hunto, anto nos como esnan responsabel cu kier a yega na nos comunidad duna nos sosten, caminda por”, Dahariana Evertsz a splica.
El a agrega cu tambe ta importante pa haci esaki como un relacion di trabao cu nan por bay traha hunto y mantene esaki como algo constante, den futuro tambe.
Dahariana a indica cu tin diferente factor di con tin hende no ta confia den e cuido medico akinan, y esaki ta, simplemente, pasobra e informacion no ta yega na nan. “Nan no ta haya informacion suficiente accesible pero tambe tin e factor di hendenan cu sa e informacion aki, pero pa “x” motibo nan tin miedo di wordo diagnostica cu algo, y cuminza cu e proceso ta algo basta dificil, y si e resultado no a bin manera nan a spera, con nan ta bay cuminza, con ta bay expresa esaki na nan famianan”, e dama a subraya. El a agrega cu ta keda na cada persona individual, of como famia, pa zorg pa bo haci e testnan rekeri.
El a agrega cu ta Salud Publico su responsabilidad pa duna e pueblo tur hermentnan cu tin mester, pa sa ki informacion aki ta, na unda bo por ricibi’e, kico ta e hendenan cu por duna bo sosten.
El a subraya cu e ta haya hopi bunita con cada organizacion ta mercadea esaki door di duna tayer di trabao, online brochures, videonan, cu ta un tremendo iniciativa, pasobra pa haci e bon escogencia den bida mester ta facil tambe.
