Delta Aruba Leo Club y One Happy Island Lions Club a tene fiesta di pasco pa grupo di mucha

ORANJESTAD (AAN): Recientemente e hobennan di Delta Aruba Leo Club hunto cu e miembronan di Aruba One Happy Island Lions Club a organiza un fiesta pa alrededor di 50 mucha di tur rond di Aruba. 

   DIARIO a compronde cu e fiesta aki a tuma lugar na DC9 Zone Air Aruba na Santa Cruz.  E muchanan a haya un recorido den e cas monumental cu tur su artefactonan di antaño, tambe nan a haya recorido den e avion di Air Aruba.  Fuera di esey, tabata tin contamento di storia, nan a hunga den dino jump, tur mucha a haya snacks y coy bebe y na final cada un haya un regalito bao kerstboom. Sigur un atardi masha placentero unda e muchanan a goza un mundo.

   Directiva y miembrecia di Delta Aruba Leo Club y Aruba One Happy Island Lions Club kier a gradici Sr. Dennis y Señora Dientje Hassell pa pone nan cas y avion disponible pa e evento aki. Tambe kier a gradici Sr. Sergio Winterdal cu a coopera tambe durante e atardi aki door di conta storia pa e muchanan pero cu tambe durante henter aña a coopera cu e clubnan pa cu nan proyectonan.