NASSAU: Ministerio Publico awor ta dunando guia legal, despues cu un Tankero di Gas cu a haye envolvi den un accident cu un Super Yate di 207-pia, a sink siman pasa Diabierna dilanti costa di New Providence na Bahamas.
Autoridadnan Portuario a cuminza cu un investigacion den e accident aki, y Departamento di Medio Ambiente ta haciendo un examen tambe pa mira ki impacto tin na medio ambiente na e pais.
E Super Yate ‘Utopia IV’ cu a costa US$ 51 miyon, a wordo diseña y construi pa e fabrica Rossinavi na Italia na aña 2018.
Diseñadornan Italiano a bisa cu e Yate ey ta equipa cu cuatro motor Rolls-Royce, como tambe cuatro Hydro-Jet cu ta dune un velocidad top di 33 nudo, un velocidad promedio di nabega di 26 nudo.
No ta conoci ki velocidad e Super Yate tabata nabegando ora cu el a bay dal tras di e Tankero M/T Tropic Breeze.
Un boletin di Maritime Management LLC cu ta maneha e tankero M/T Tropic Breeze, a bisa cu nan barco a wordo gedal pa 10:03 pm net Bispo di Pasco door di e Super Yate M/Y Utopia IV como 15 miya Noord-Noordwest di New Providence.
Maritime Management a bisa cu e Tankero di 160 pia largo tabata nabegando rumbo pa Great Stirrup Cay, ora cu e Super Yate di 207-pia a bin dal su tras.
“E forza catastrofico di e colision a kibra e parti patras di e tankero, y esey a pone esaki sink bay te na fondo di lama cu eynan ta como 2.000 pia,” e compania a bisa.
Prensa a bisa cu dos homber di nacionalidad di Guyana, identifica como Chief Engineer Colin Ward y Joshua Campbell, a wordo evacua di e Tankero, y cu tur miembro di tripulacion a wordo rescata.
Segun Maritime Management, e cargo di e Tankero a inclui materialnan cu ta no-persistente, esta LPG Gas, Marine Gas, y Automotive Gas. Tur esakinan ta mas liviano cu awa, y lo evapora si nan wordo exponi na aire di superficie.
Debi na e profundidad cu e ta, a conclui cu e Tankero aki lo no por wordo saca mas di eybao, pues ta den fondo e lo keda.
