ORANJESTAD (AAN): Directiva di organisacion Women empOwering Women (WOW) Aruba ta consisti di hende muhe determina y inspira pa empodera otro hende muhe.
Desde 2017 organisacion WOW Aruba a bin ta brinda su miembronan e oportunidad pa desaroya y mehora nan habilidad personal, social y profesional.
Durante 2021 WOW Aruba a organisa diferente actividad pa su miembronan ofreciendo e oportunidad pa siña y crece a traves di reunionnan educativo, social, proyectonan boluntario y caritativo cu e meta pa pone luz riba empoderamento di hende muhenan den nos comunidad.
Como parti di nan proyecto “Impactful Women” a pone luz riba diferente hende muhe local, di diferente generacion y profesion cu e meta pa promove inclusion di hende muhe na Aruba; na inicio di e proyecto aki a haci un peticion na Gobierno pa tres caya na Aruba wordo nombra cu tres nomber di hende muhe local cu a haci un impacto den nos comunidad a traves di nan logro. Actualmente conseho riba e peticion aki ta den proceso na e departamento concerni. E meta ta pa 2030 Aruba tin mes un hopi caya, edificio, rotonde cu nombre di hende muhe y homber.
A realisa diferente actividad manera entre otro riba dia internacional di hende muhe, asina generando fondo cu a bay pa Fundacion Contra Violencia Relacional, crea receta ‘budget friendly’ pa asisti durante pandemia, campaña ‘#UsForHer’ pa stimula nos comunidad pa haci promesa contra practicanan di desigualdad, zomer workshop ‘Un guia pa mucha muhe crea e futuro’ unda nos a invita mucha muhenan (teens) pa imagina e futuro y pa explora y uza nan imaginacion, ‘Stroll for the Soul mindful walk & meditation’ unda nos a empodera e participantenan femenino pa haci uzo di naturalesa pa preserva nan salud mental y recarga nan mes cu energia positivo, ‘Santa’s Cause Project’ unda WOW Aruba a haci donacion di 15 regalo pa asina mas mucha por a disfruta di pasco.
WOW Aruba ta contento di mira cu a pesar kisas cu e no tabata un aña facil pa comunidad, nos hende muhenan a sa di mustra resiliencia, surpasando diferente desafio den nan caminda.
Nan deseo pa 2022 ta pa mas hende muhe sostene y apoya otro hende muhe, empoderando otro pa asina hunto logra tur meta pa aña 2022.
