Delegacion di Aruba ta enfoca riba relacion den Reino y bienestar di studiantenan

Parlamentario Jennifer Arends-Reyes

ORANJESTAD (AAN): Durante e prome dia oficial di su bishita di trabou na Hulanda, e delegacion di Aruba a cuminsa cu un serie di reunion importante  pa delegacion di Aruba prome cu cuminsa cu reunionan di Tripartite di islanan Aruba, Corsou y St. Maarten y Encuentro Interparlamentario di Reino of IPKO (Interparlementair Koninkrijksoverleg).

E prome encuentro a tuma lugar na Raad van State, caminda e delegacion a reuni cu Sr. drs. Andy Lee, representante di Aruba na e instancia aki. Raad van State ta un organo sumamente importante den Reino, conoci pa duna asesoramiento y recomendacion riba conceptonan di ley di Reino. E tabata un bon reunion caminda e delegacion completo por a intercambia ideanan cu otro y haci varios pregunta.

Ademas di esey, e delegacion a tuma parti den un bishita na Haagse Hogeschool, caminda nan a tene un ‘meet & greet’ cu studiantenan Arubiano na Hulanda. Durante e encuentro, e studiantenan a comparti nan preocupacion y experencianan rondo di temanan esencial manera: ayudo cu idioma Hulandes, accesibilidad di curso, scarcedad di vivienda, costo halto di bida y maneho di finanzas personal.

Tur parlamentario presente a tene un participacion activo, duna reaccion y contesta e preguntanan plantea pa e hobennan studiante.

Como presidente di Comision di Relacionnan di Reino y Relacionan Exterior, Sra. Jennifer Arends-Reyes a habri e sesion, duna un introduccion y pone cla e intencion di e encuentro. “Nos ta kere cu e dialogo directo cu e studiantenan y representante institucional ta fundamental pa identifica problemanan real y traha hunto riba solucion,” Arends-Reyes a bisa.

E delegacion di AVP y Parlamento di Aruba lo sigui cu reunionnan oficial diahuebs, diabierna y diasabra na Hulanda den marco di Tripartite y IPKO, cu meta pa fortalece e relacionnan di Reino y defende interes di pueblo Arubano na nivel internacional.