Minister di Enseñansa Gerlien Croes:
ORANJESTAD (AAN): Minister di Enseñansa Gerlien Croes, ta enfatisa cu cualkier aumento di salario mester ta implementa den un manera structural, pa garantisa cu Land Aruba por sostene esaki den e añanan cu ta bin.
Segun e minister, e docentenan cu ta traha pa Dienst Publieke Scholen (DPS) ta den servicio di gobierno y ta cay bou di e gasto di personal di gobierno. Mientras cu e scolnan di Stichting Katholiek Onderwijs Aruba (SKOA) y otro bestuurnan di enseñansa ta wordo subsidia pa gobierno.
E minister a enfatisa cu ora cu ta aloca fondo pa salario, ta haci esaki pa gastonan di personal di Land Aruba y tambe pa e bestuurnan. Esaki, segun Minister Croes, ta un suma cuantioso cu lo sigui crece anualmente pa motibo di bevordering di cada grupo.
Minister Croes a expresa cu e retonan den educacion y e sistema educacional di Aruba ta hopi grandi. Educadornan no solamente ta para dilanti di klas y duna les. Nan ta enfrenta diferente tipo di situacion, atende cu muchanan cu ta den diferente spectrum cu tin mester extra atencion. Y hopi biaha, e educador mes ta pone energia adicional sin compensacion, mientras cu nan mes ta inverti den nan propio desaroyo y metodonan.
E titular di Enseñanza a enfatisa cu e aumento di salario pa docentenan ta merecidamente na su luga y ta indiscutibel. Pero mester haci esaki den un manera responsabel. Pero no solamente nan merece un aumento di salario, pero tambe oportunidadnan pa crecemento personal y profesional, manera entre otro cursonan.
Minister Gerlien Croes a enfatisa cu su ministerio ta intensamente ocupa cu e esaki, cu e meta pa implementa un sistema husto y sostenibel di aumento di salario den e veld di enseñansa.
