Confiansa di negoshi a 'boost' den e segundo trimester di 2021

Resultado pa e di segundo trimester di 2021 - ORANJESTAD (AAN):  Banco Central di Aruba (BCA) recientemente a conclui e encuesta di percepcion di negoshi pa e di segundo trimester di 2021.

E encuesta di percepcion di negoshi ta evalua e percepcion economico di e negoshinan local, como tambe e impacto causa pa e pandemia di COVID-19 riba nan actividadnan di negoshi.

            Durante e segundo trimester di 2021, e asina yama ‘Business Perception Index’, cu ta consisti di e indicenan di condicionnan economico actual y condicionnan economico a corto plaso, a nota un subida di 9,2 punto di indice te na 106,5 riba 100 desde e promer trimestre di 2018, cual ta refleha un mehoracion den confiansa di negoshinan (Grafiek 1). Esaki ta debi na un mehoracion den e percepcion di negoshinan pa cu tanto condicionnan economico actual y a corto plaso.

            E indice di condicionnan economico actual a expande cu 11,7 punto di indice te na 105,4 compara cu 93,7 den e di promer trimester di 2021. Tambe, e indice di condicionnan economico a corto plaso a registra un crecemento di 5,0 punto di indice, esta for di 102,7 den e di promer trimester di 2021 te na 107,7 den e di segundo trimester di 2021 (Tabel 1).

            E porcentahe di encuestadornan cu ta premira un crecemento economico positivo den e siguiente 12 lunanan, a nota un subida substantialmente, esta di 34,8 punto di porcentahe te na 61,3 porciento.

            Pa locual ta e impacto causa door di e pandemia di COVID-19, BCA a amplia e encuesta di percepcion di negoshi, pa asina tambe evalua e percepcion riba su impacto ariba benta di negoshinan, necesidad pa aplica pa fondonan di emergencia y e expectativa di recuperacion economico.

            Den cuadro di esaki, mester tuma nota cu solamente un tercera parti di e negoshinan encuesta (32,5 porciento) a indica cu e pandemia di COVID-19 a sigui tin un impacto significante riba e benta di nan negoshi, esta 12,2 punto di porcentahe menos compara cu e di promer trimester di 2021. Di otro baaanda, mas negoshi ta anticipa subidanan den prijs den e siguiente 12 lunanan.

            E informe completo di e encuesta di percepcion di negoshi ta disponibel riba website di BCA (https://www.cbaruba.org/).