E cantidad di habitante di Aruba ta hustifica e cantidad di Miembro di Parlamento? - *Cuanto hora pa dia un Miembro di Parlamento mester traha pa su salario? - *Kico ta contenido y exigencia pa e trabou di Representante di Pueblo di Aruba?
ORANJESTAD (AAN) — Ta necesario pa Aruba paga un cantidad di 21 persona e salario di Miembro di Parlamento? Ta necesario pa Aruba paga tur otro gasto relacion cu Representacion di Pueblo di Aruba?
Informacionnan ta mustra cu Aruba y otro paisnan den Reino a yega na un acuerdo cu Hulanda pa loke ta trata COHO, cu ta e asistencianan financiero cu Hulanda lo duna pero combina cu su exigencianan.
Ora COHO a subi mesa, hopi a wordo papia.
DIARIO tambe a mustra cu mester respeta e base legal di Aruba. Pero na mes momento DIARIO semper a mustra cu tin asuntonan cu porfin mester haya atencion.
Ora un persona kier solicita pa un trabou na un empresa priva of un trabou den Gobierno, e mester splica con e por aporta na e compania of na Gobierno.
No ta asunto solamente di cual estudio e tin, pero cual trabou e ta bay haci y si e por cumpli cu e trabou aki.
E persona cu ta busca un empleado, ta presenta e demandanan laboral di e persona y ta tene na consideracion cuanto empleado su compania mester pa e no topa cu situacion di bancarota.
Aruba mester paga pa su Parlamento. Cuanto hora un Miembro di Parlamento ta traha pa dia y kico e ta considera trabou?
Pasobra aki e problema ta cuminsa.
Mescos cu ta e caso na tur compania, na Aruba tambe tur dia tin mas caso cu mester di atencion. Kico e papel di Parlamento ta realmente den e casonan cu mester di atencion?
Tur problema ta wordo presenta na Gobierno, cu ta e instancia cu realmente ta traha. Esaki ta haci cu orignalmente ta Gobierno (Conseho di Ministro) tabata haya salario y Miembronan di Parlamento di Antia y di Conseho Insular tabata ricibi un compensacion basico y un pago pa cada reunion na cual nan asisti.
Na cierto momento e areglonan original den Reino relaciona cu autonomia, a cambia y representacionnan di Pueblo a conoce miembronan cu un salario fiho, cu pensioen, cu otro areglonan.
Pa haci kico? Pa percura cu interes di e partido a wordo sirbi y na eleccion nan haya mas voto?
Ora sigui cantidad di reunionnan di Parlamento, kico ta bini dilanti?
Nos no kier generalisa, pero berdad mester wordo papia.
Aruba realmente mester paga pa 21 persona, cu no tin un horario fiho di trabou ni un contenido fiho di trabou?
Masha bunita pa bisa cu Parlamento ta controla Gobierno. Ya na cantidad di ocasion, e pregunta a wordo lansa kende ta controla Parlamento. Pero e pregunta directo ta, kico ta trabou di Parlamento?
Aruba tin mas of menos 110 Mil habitante. Mester di 21 Miembro di Parlamento pa mira kico Gobierno ta haci? Ora nan mira kico Gobierno ta haci, kico ta pasa?
Aruba ta den problema pasobra entre 2009 pa 2017, segun rapportnan oficial, miembronan di Parlamento a entrega Gobierno Mike Eman un fondo di 1.6 Biyon pa e haci manera e y Benny Sevinger kier a haci. No tabata tin control posibel.
Parlamento a permiti pa Mike Eman a destrui e situacion financiero di Aruba. Parlamento a permiti pa Mike Eman silencia henter Parlamento, kibra Ley pa introduci Citgo.
Aruba a paga Parlamento pa destrui Aruba durante 2009 pa 2017 manera rapportnan y casonan legal ta indica.
Mester di 21 Miembro di Parlamento? Kico nan ta haci? Propaganda pa nan partido gana eleccion?
Un pregunta serio a surgi pasobra awe Aruba mester mira su futuro y mester cuminsa papia na un forma serio di casonan y asuntonan cu demasiado hende tin miedo di trece dilanti.
Ta e momento pa coy e toro na su cacho!
