Prijs y calidad di companianan di Estado ta mas importante cu nunca - *Ganashi di un negoshi ta dicidi riba entrada y calidad di bida di e doño - *E peso internacional ta causante di problema personal pa comerciantenan
ORANJESTAD (AAN) — Covid-19 no solamente riba tereno medico ta exigi hende pensa. E pandemia a nifica cu asuntonan cu hende pa demasiado tempo a tuma como garantia, awor ta exigi atencion profundo.
Durante Siglo 20 sigur por a mira con e lucha pa mehoracion di bida di hende a wordo utilisa tambe, pa lidernan cu a manipula pueblo bini dilanti.
Si den pasado por a mira con na Aruba y henter mundo, e negoshi local a produci un relacion special entre comerciante y trahador (aki no ta atende cu algun excepcion di abuso cu por a presenta), antagonismo a crea problema entre e comerciante y su personal.
Pensamento di personanan cu a abusa di asuntonan social y despues a bira e pio dictadornan na mundo cu a trapa riba tur derecho di hende, a deshaci di e nocion real di comercio como e vehiculo no solamente pa e trahado progresa pero e vehiculo cu e comerciante ta usa pa e por come y biba.
Un comerciante mester di su ganashi, cu ta su salario pero cu tambe mester cubri tur gasto di su negoshi y inversionnan cu e mester haci.
Na e momentonan aki e necesidad di crecemento di comercio ta bini dilanti pa asina soluciona problemanan financiero y social di Aruba. Mester di entrada pa e machine di Aruba por sigui produci bienestar den un situacion di pandemia incalculabel.
Afortunadamente a drenta e informacion cu Aruba a yega na un acuerdo cu Hulanda pa por sigui cana y por bay spera cu Hulanda ta duna Aruba asistencia.
Sinembargo, si Aruba kier sigui dilanti como un pais liber y no un pais dictatorial y socialista den cual trabou y tur lo demas ta depende di un man yen di hende cu ta lansa nan mes como lider, mester cuminsa papia di e situacion di comerciantenan.
Segun e rapport di Banco Central, durante e segundo trimester di 2021, comerciantenan ta di opinion cu tin un aumento di prijs na caminda.
Esaki ta algo cu mester a wordo spera y cu DIARIO a mustra como posibilidad grandi for di 2020 ora e pandemia a presenta y a afecta negoshi mundial.
Na diferente ocasion DIARIO a adverti pa e realidad aki pasobra mundialmente prijsnan ta subi.
Comercio ta un circulo caminda produccion comercial ta depende di otro. E comerciante na Aruba ta depende di prijsnan internacional, cu a aumenta barbaramente.
E prijsnan basico di articulonan a subi pero tambe e prijsnan di transportacion, di gasolin y tur loke ta yuda prijs subi.
E forma pa Aruba atende cu e problema aki sigur ta, pa baha e gastonan di utilidadnan di Aruba. Aki nos ta papia di companianan vital, di companianan di Estado di Aruba, cu ta dicidi pa prijs di awa, coriente, telefon, haf, aeropuerto y tur loke ta basico di e pais.
E prijs y calidad di productonan di loke Companianan di Pueblo ta produci, mester asisti comerciantenan tambe.
Importante ta pa comprende cu den e situacion actual di crisis mundial, Aruba mester haya mas comerciante pa asina por habri cupo di trabou.
Na e momento aki no ta Aruba so tin un crisis pero henter mundo, cu ta mira comerciantenan den problema hasta personal serio. Comerciantenan rond mundo, cu a hinca tur nan placa den nan negoshi, awe no por sigui dilanti. Desesperacion ta bati na porta di cantidad di comerciante rond mundo.
Aruba awe mester biba cu un realidad cu no por perde for di bista. E normal nobo lo ta diferente na loke un pasado di abundancia tabata. Awe henter mundo ta carga cu debe, cu problema, pero ta lucha pa sobrevivi.
Pero pa sobrevivi hende mester uza nan sano huicio y bolbe na loke nan a laga atras ayera, ora comunidad a wordo ciega pa thesis y teoria cu ta stroba e mes comunidad pa cana dilanti y yega na solucion y progreso.
