Compania NV Elmar awor tin ekipo ‘Totus’ tambe na Aruba

Ekipo ta monitor azeta den diferente Sub-Stacion

ORANJESTAD (AAN): Pa awor ta casi tur hende sa, cu cada transformer di coriente cu tin sea colga na palo di luz, of poni den transformator huisje, of den Sub-Stacion, tin ‘azeta’ den dje.  Den pasado por corda cu tin hasta ciudadano cu ta bay busca e azeta usa aki, pa asina nan basha esaki riba nan curpa pa “kita cierto malesa”, of produci alivio pa algun malestar.  Aparentemente esey no ta socede mas.

   Otro indicacion interesante ta cu e compania NV Elmar tabata extrai azeta anualmente for di 14 transformer grandi pa manda esaki test afo, evaluando nan condicion basa riba e contenido di gas den e azeta.

   Awor NV Elmar ta haciendo un transicion pa practicanan di mantencion predictivo, mientras nos ta persisti den nos esfuersonan continuo di mantencion preventivo y mantencion corectivo.

   Pero awor NV Elmar tin un ekipo yama ‘Totus’.  Danki na e ekipo aki yama ‘Totus’, e compania por monitor continuamente e azeta di e transformer pa 9 gas, sigurando un evaluacion constante di condicion di e transformer enbes di depende riba un inspeccion anual.