Ainda tin hopi hende riba e isla cu no a bay paga nan boet
ORANJESTAD (AAN): Informacion nobo ricibi e siman aki, ta mustra cu durante aña 2024, Ministerio Publico lo sigui structuralmente cu cobra debenan di boet.
Ministerio Publico a splica cu esey lo ta den cooperacion cu CEA y grenspolitie. Personanan cu a worde condena door di huez pa paga un boet y cu no a cumpli nunca cu esaki, lo worde bishita na cas door di CEA of lo worde para na frontera door di grenspolitie.
Si resulta cu un hende no por of no kier paga su boet, e lo worde deteni mes ora y traslada pa prison pa sinta su dianan di castigo. Un hende cu worde para na airport door di grenspolitie, ta core riesgo pa perde su vuelo.
Ministerio Publico ta haci un yamada urgente na personanan cu tin debe di boet, pa nan percura pa cumpli cu esaki.
Bo persona por paga online via e number di cuenta 4000905 di Ministerio Publico na Arubabank bao mencion di bo parketnummer. Tambe por swipe na caha di Ministerio Publico despues di haci un afspraak via e website www.omaruba.com.
