Tin tres motibo importante pakico lora a bay perdi na Aruba 76 aña pasa

Segun investigador di Parke Nacional Aruba

ORANJESTAD (AAN):  Giancarlo Nunes di Fundacion Parke Nacional Aruba a splica cu e motibo pakico e loranan a bay den extincion na Aruba ta pa diferente motibo. Nan a bay extinto den aña 1947, kiermen 76 aña pasa y hopi hende a pensa cu esaki a pasa door di e boa.

            E boa a wordo introduci na Aruba  den añanan 1990, 30 aña pasa. Pero a loranan a bay perdi den aña 1947, a reitera.

            E boanan ta un menasa aworaki sigur y pesey FPNA a sigui traha riba e programa di boa. Ta percura pa den parke sigui elimina boa y tambe ta focus unda e loranan aki ta.

            Un bes cu a loranan cu a wordo poni den naturalesa cuminsa reproduci, ta keda busca loranan na e lugarnan unda nan ta broei y come, a bisa.

            Nunes a indica cu e bon noticia ta cu a haya sa tambe cu boa no ta broei den parke. Nan ta broei pafo di parke. Na cas di hende, unda tin awa y cuminda. E boanan cu ta den parke ta boanan chikito cu no ta yega na un edad cu nan por reproduci.

            E boanan grandi no ta biba den areanan grandi di naturalesa di Aruba. No ta un bon lugar pa nan biba.

            Locual comunidad por haci ta yuda elimina boa pafo di parke pa asina nan por reproduci menos, Giancarlo Nunes a remarca.

            Tin otro menasanan pa e loranan cu ainda ta existi. Den pasado no tabata e boa cu a elimina e loranan, pero tabata tin 'poaching' cu ta ora cu hende ta saca bestianan for di nan habitat, saca nan for di e neishi, saca e webo of saca e babynan for di e neishi pa bay bende nan of hinca nan den haula. Esey tabata un di e motibonan cu e loranan a bay perdi.

            Den tempo di Lago, hopi hende a bin Aruba, tabata kier lora y hopi mas hende a cuminsa saca nan for di nan habitat, a splica.

            E di dos motibo grandi pakico e loranan a bay perdi ta cu den pasado na Aruba tabata tin hopi cunucu y e cunukeronan tabata gara of tira e loranan of nan tabata drenta nan cunucu. Esaki tambe ta algo cu FPNA ta suplica e cunukeronan pa no haci y bay traha y biba hunto cu e loranan, cu ta parti di Aruba y cu ta forma parti importante di naturalesa.

            E ultimo motibo pakico e loranan a bay perdi ta pasobra a perde hopi area di naturalesa. Den pasado caba hopi mondi a wordo roza, pa agricultura of pa construccion y ora cu perde mas naturalesa ta haya menos lugar pa e loranan aki.

            Tur e combinacion aki hunto a haci cu e loranan a bay perdi. Pero aworaki cu parke ta regenerando di un manera bunita ta spera cu e loranan por tin un bon lugar pa biba.

            Mester minimalisa e menasanan contra e lora y pa esaki ta bay sigui haci sondeonan y investigacionnan cientifico pa asina sigui siña mas di e lora y con pa mehora e habitat di e parke pa sostene e loranan di un miho manera, Giancarlo Nunes, Research & Conservation Manager, Fundacion FPNA, a duna di conoce.