ORANJESTAD (AAN): Diferente comentario por a tende Diaranson riba e anuncio cu e conocido Henry ‘Heintje’ Ras lo bay reta su mes cu un hazaña unda e lo drenta dia 2 October 2021 den Mina di Fosfaat, y sali bek te dia 9 Januari 2022 di eybao.
Tur esaki ta pa duna impulso y haya donacion di pueblo y comercio, pa haci e Mega Museo Aruba bira realidad.
Heintje Ras lo keda 100 dia den e cuebanan di mas grandi cu ta e Mina di Fosfaat, pa asina yuda Fundacion Museo di Antiguedad Nos Bieunan haya fondo pa traha e Mega Museo.
Henry ‘Heintje’ Ras tin basta aña caba ta haci tournan den Mina di Fosfaat, tanto pa nos hendenan local y turista.
Historia di e Mina: Tabata na aña 1873 cu J.H. Waters-Gravenhorst a descubri Fosfaat na Sero Colorado y na Sero Colebra. E tempo aya cu e Trein di Aruba Phosphaat Maatschappij (AFM) cu a worde funda den December na aña 1879 tabata transporta e fosfaat pa e botonan. Un total di 20 Wagon tabata wordo usa pa transporta e Fosfaat. A traha un rail di tram di 6 kilometer for di e Mina na Sero Colorado te na e waf di San Nicolaas pa asina transporta e fosfaat, pa e worde exporta riba botonan di bela pa Francia, Inglatera, y Spaña. E Fosfaat tabata tin Acido Fosforico den dje, cu a worde uza como e.o. fertilisante pa mata.
Henry ‘Heintje’ Ras semper tabatin e filosofia cu hobennan di Aruba merece di tin e derecho di sa e parti di e Mina aki di historia di e isla.
Heintje Ras for di hopi aña caba, ademas di ta un bombero di profesion, ta un coleccionista di artefacto y obhetonan hopi anticua y historico. Tambe e tin un coleccion di varios auto classico y di basta aña bieu.
Pa medio di tur e coleccionnan aki, su cas a converti poco-poco den un cas museo. Riba dia 3 di Mei 2019 el a funda Fundacion Museo di Antiguedad Nos Bieunan Aruba cu ta situa na su propio cas na Rooi Master # 5-E na Brazil.
Pero Sr. Heintje Ras tin un deseo, un soño, un pasion e mundo aki di colecciona articulonan, artefacto y obhetonan hopi anticua y historico, manera disconan, tocadisco, diferente hero di strica, telefonnan, camaranan, machin di mula, machin di cose, etc. y su cas a bira chikito pa tur e inventario cu e tin di coleccionnan bieu.
E Hazaña Mega Museo Aruba 2021 ta e evento cu Sr. Heintje Ras ta desea di realisa no solamente pa recauda fondo pa yega na su edificio di Mega Museo Aruba, sino tambe pa pone Aruba su nomber na laira.
Pa bay record mundial: Esaki door di haci e hazaña aki tambe ta pa kibra recordnan mundial internacional den e buki di ‘Guinness Book of World Records’.
E grupo di boluntarionan cu ta apoyando y preparando esaki pa Heintje Ras, ta trahando duro pa asina riba Diasabra 2 di October 2021 e ta drenta den e Mina, keda bao tera tanto pa Sinterklaas, pa Pasco, pa Aña Nobo, y sali bek te riba Diadomingo 9 Januari 2022, pa asina kibra e Record Mundial.
E team ta conta cu masahista Willy Willems, nutricionista profesional Rene Wild, kende ta certified personal trainer y precision nutricision level 1 y 2 nutricionist, su Docter di Cas, tambe ex-Hefe di Bombero Jaime Lacle, kende ta pensionado, Director di BRA, sr. Rino Hermans y su Departamento lo haci un training durante e hazaña y boluntarionan balente.
For di awo caba lo por cuminsa na haci donacionnan online riba e cuenta di Banco
RBC # 7700000100257292.
Janiro ‘Ataniro’ Eisden lo percura pa e eventonan musical durante e 100 dianan y nan ta spera cu e artistanan grandi lo forma parti y apoya e evento aki.
