Cas di Madushi di Marisol por drenta historia como hotel

ORANJESTAD(AAN)—Na 2008 DIARIO a wordo confronta cu noticia serio cu e mester a presenta na Aruba.

Tabata trata di un caso unico, den cual Marisol Tromp, cu MEP a lansa e tempo como uno di su politiconan pa futuro, a dicidi di bay construi un brug na Noord.

Riba su mes construccion di un brug den un bario pobla manera Noord, cu hasta conoce sitionan den problema durante yobida, por a wordo considera como algo na beneficio di Pueblo di Noord.

Den e caso aki , sinembargo, no tabata tin mucho beneficio pa Pueblo di Noord pasobra e brug tabata un construccion cu mester a evita cu personanan cu kier a yega e cas di madushi di Marisol na Noord, mester a pasa un caminda largo of bula hopi halto pa yega e cas di madushi cu a drenta historia politico di Aruba.

Tur informacion cu a ricibi te awe no por a contradeci e loke a bini dilanti e tempo, cu Marisol no a laga tene un destaho publico manera ley ta rekeri pa a traha e brug, cu a costa Aruba 600 Mil Florin.

Pues tabata trata di un gasto di mas cu Mey Miyon cu Pueblo di Aruba mester a haci pa e cas di mashi a haya coneccion cu uno di sitionan mas na e parti Noord di Aruba, sigur si a tene na consideracion e crecemento di turismo y e aumento di balor cu Cas di Madushi mester a haya cu e placa di Pueblo cu a gasta pa e brug.

E brug a keda como un monumento politico, pero sumamente silencioso mientras Marisol tabata pasa di partido pa partido den politica di Aruba cu e cas di Madushi den background.

Awe informantenan a bati na porta di DIARIO cu informacionnan pisa, mientras Marisol a dicidi di bini cu su propio partido, despues el a pasa di MEP pa AVP pa POR y a keda independiente na diferente momento tambe.

Marisol a regla pa awe e ta MAS, e partido di cual e ta Presidente,

Como Teserero di Partido MAS ta fungi su ruman muhe Lelicia, cu awe ta drenta noticia pa motibo di e cas di Madushi.

Informantenan clave a manda pa DIARIO algun documento cu actualmente nos tin bou investigacion pisa ya cu nan ta mustra con na 2020, mientras pandemia a ataca Aruba, Marisol mester a regla erfpacht pa su ruman muhe.

DIARIO tin copia di un carta cu a wordo dia Prome di Juni 2020 dor di e ruman di Marisol, Lelicia, na Marisol cu e tempo tabata Ministro di Aruba y encarga cu asuntonan di tereno como sucesor di Otmar Oduber, cu a retira como Ministro.

Den e carta Lelicia ta pidi pa prolonga e tempo cu e tabata tin un que otro pa sigura erfpacht di e tereno cu mester a bolbe wordo otorga y cu cambio den e destinacion.

E carta di Lelicia tabata fecha dia Prome di Juni 2020 y e carta di DIP na Marisol tabata fecha 9 di Juni 2020 y den e carta DIP ta bisa cu e no tin nada contra pa prolonga e tempo cu Lelicia tin pa atende e erfpacht a base di un acto di notario.

Den e carta pa Marisol, Lelicia ta papia tambe na nomber di Xpand Communication Services, cu ta un compania cu ta traha riba tereno di comuinicacion.

Informacionnan cu DIARIO a ricibi ta, ta indica cu henter e asunto lo ta directamente relaciona cu e Cas di Madushi cu por bira un hotel of en todo caso un tipo di acomodacion cu no ta relaciona cu e servicionan cu Xpand, segun su registro na Camara di Comercio di Aruba, lo ta atende.

Informantenan di DIARIO na e momentonan aki ta trata na tur forma pa haya concretamente tur informacion riba e destinacion cu e Cas di Madushi di Marisol mester tin den futuro.

Importante pa informantenan ta na e momentonan aki, pa mira si prioridad a wordo duna na Lelicia, ruman di Marisol na momento cu e asunto tabata den man di Marisol atrobe como Ministro di Aruba mientras cu hopi atencion ta wordo pone na e diferente relacionnan entre Marisol y Lelicia awor hasta den liderazgo di e partido MAS, cu cual Marisol ta bay eleccion.

Teniendo cuenta e tempo pa Aruba bay urna electoral, DIARIO ta atendiendo e asunto cu cantidad di informantenan pa por presenta Aruba tur aspecto di un asunto den cual dos ruman Marisol y Lelicia ta envolvi y ta mishi directamente cu politica y futuro di un cas, situa na un brug exclusivo, cu a marca historia politico di Aruba.