ORANJESTAD(AAN)— Na November 2020, Evelyn Wever-Croes a tuma un decision historico como Prome Ministro di Aruba.
El a dicidi cu ningun gobernante ta dicidi kende ta haya tereno di Aruba y cu DIP como unico instancia oficialmente encarga cu tereno, tin e derecho exclusivo pa determina kende ta haya tereno di gobierno.
E decision aki di Wever-Croes tabata uno di e cambionan importante cu a wordo tuma den historia di Aruba como pais, cu asina a atende cu uno di e problemanan mas serio cu e pais a conoce.
Mientras autoridad ta atende cu e caso di dunamento di tereno cu a manda cantidad di hende prison, un asunto pa tereno di ruman di Marisol ta drenta noticia y ta hiba Aruba directamente na e forma cu abuso por wordo comete cu placa di Pueblo manera a pasa den caso di e Cas di Madushi di Marisol Lopez-Tromp/
E pregunta grandi cu Aruba ta haci su mes awor ta, pakico ta awor a dicidi cu politica ta keda leu for di asunto di tereno.
Pa Ley ningun momento politica mester a dicidi pa kende tereno ta bay of no ta bay ya cu aki tambe ta trata di un asunto cu nos leynan ta defini mas cu cla.
Politica mester sirbi e cuadro di ley y cu ta menciona exactamente kico gobernacion di un pais ta contene y kende ta haci kico den cada funcion.
Ta Ley ta mustra cu den ehecucion di gobernacion tin departamentonan di Gobierno cu independiente di e gobernantenan na mando, mester percura pa bienestar di e pais.
E departamentonan di Gobierno no mester traha a base di loke un gobierno kier, pero a base di loke ley ta manda nan pa asina garantisa cu tur Arubiano ta wordo beneficia na mes forma.
Cu e caso Avestruz un abuso a wordo descubri. Un abuso cu a conoce un solucion den practica, ora Prome Ministro Wever-Croes mester a sigui Marisol Lopez-Tromp na 2020.
Na un forma categorico Prome Ministro Wever-Croes a pone fin na e fuente di problema cu tereno y a mustra cu tereno ta wordo otorga door di DIP y cu ningun politico ta mete den e proceso aki.
Ta e tipo di decisionnan aki Aruba mester pa pone fin na e problemanan mas grandi pa democracia por prevalece y ta realidad den politica na Aruba.
No solamente den asunto di tereno, pero riba tur otro tereno e forma cu Prome Ministro Wever-Croes a atende cu tereno, mester bira e caminda cu politica ta sigui.
Un ciudadano mester sostene un partido politico pasobra e ta bon pa e pais y no pasobra por haya trabou, por haya tereno of cualkier otro fabor.
Den e restauracion di e base di Estado di Derecho di Aruba sigur Hulanda lo exigi pa Aruba wordo goberna segun ley. Un asunto cu a bira realidad pa loke ta trata tereno, cu a demostra di tabata un pot politico cu a afecta democracia na Aruba seriamente.
