ORANJESTAD (AAN): Den un propaganda cu Banco Central di Aruba a publica Diamars den DIARIO, por a nota cu e restriccionnan pa divisa na Aruba a wordo suavisa. Ta trata aki di un suavisamento gradual.
Manera ta conoci, aña pasa ora cu e pandemia a dal Aruba, mesora Banco Central a bin cu e restriccion di divisas en conexion cu e efectonan economico negativo debi na Covid-19.
Esey nifica cu entrante Juni 2021, atrobe ta permiti pa bo haci pago na no-residentenan, den cuadro di e.o. pagonan pendiente di management fees na companianan madre, companianan yiu, of empresanan ruman cu no ta estableci na Aruba. Esaki ta conta tanto pa companianan priva como tambe institucionnan financiero bao supervision, tambe pago di herencia, real estate cumpra, regalo, y donacionnan.
Ademas e hendenan residente (personanan fisico) por bolbe realiza transferencia na nan propio cuentanan bancario den exterior, te na un maximo di 50.000 Florin pa aña calendario. Fondonan di pensiun corporativo y aseguradornan por haci inversion den stranhero te na un maximo di 5 miyon pa aña calendario, y usa nan cuenta local di banco pa haci pagonan den exterior.
E flexibilizacion anuncia ta posible mirando e ‘recuperacion constante di economia di Aruba,” tambe e perspectivanan positivo, specialmente pa loke ta turismo, y e hecho cu e parameternan monetario y di divisas ta aworaki na un nivel aceptable.
