Biblioteca Nacional Aruba y Famia Mansur a firma acuerdo pa pone DIARIO disponibel den forma digital

Un ‘milestone pa Biblioteca y pa Aruba!

ORANJESTAD (AAN): Un momento historico a tuma luga diamars mainta ora cu Director di DIARIO, Sr. Jossy Mansur a duna autorisacion na Biblioteca Nacional Aruba pa e  coleccion di Matutino DIARIO, cu dia 3 di November venidero ta celebra 45 aña di existencia, por ta disponibel  pa comunidad henter den forma digital pa medio di e plataforma Coleccion Aruba (coleccion.aw).

   Den presencia di Sra. Zetsia Ponson, hefe di Departamento Arubiana-Caribiana; Sr. Peter Scholing, hefe di Departamento di Digitalisacion; Sra. Graciela Cheng, documentalista y demas coleganan, a haci e ceremonia di firmamento di e documento cu ta autorisa Biblioteca pa haci uzo di e material historico di DIARIO riba e plataforma digital.

   Sr. Mansur tabata masha contento di por a bishita Arubiana-Caribiana na Bachstraat 5, edificio cu antes tabata e cas di su welonan. E por a corda riba momentonan memorabel den famia na e cas cu awe ta guardian di un di e tesoronan mas valioso di Aruba, esta e herencia material tangibel: e bukinan.

   Ta trata di un coleccion invaluabel manera e coleccion nacional, coleccion Hartog, coleccion antiguo, coleccion di Antiyas, Caribiana y di Surinam, coleccion Lago, coleccion Ito Tromp, publicacionnan di gobierno y hopi mas.

   Mansur a expresa cu e ta haya esaki hopi importante y e ta aprecia “un mundo” cu Biblioteca Nacional Aruba ta mira e rol cu DIARIO a hunga den e 45 añanan aki pa yuda nos desaroya tur sector pa yega na unda nos ta awe. Un isla cu hopi prosperidad. 

   Pueblo local y internacional mester tin acceso na henter nos desaroyo den historia, pa duna un miho claridad y con a yega na unda nos ta awe”, director di Matutino DIARIO a declara.

  Banda di esaki, Zetsia Ponson a bisa cu e momento aki ta uno hopi emocional. “Ta un dia historico pa nos despues cu nos tin mas o menos 10 aña ta purba di haya ok pa bay digital cu e corant DIARIO. E ta un logro grandi”.

   “DIARIO ta e corant mas pidi na Departamento Arubiana. E no ta djis pa bo lesa e sucedido di dia. E ta pa e investigadornan, sucesonan cu a pasa den pasado of un persona of un famia cu lo kier bende un tereno anto no tin un obituario di un familiar di nan”.

   “Nan ta bin, nan ta pidi DIARIO y nan ta busca articulonan di loke por a pasa. Esaki ta algo sumamente importante pa nos tur.  Un corant ta dicta historia di un pais. Hende por skirbi hopi buki, revista, pero corant ta duna bo e informacion pa dia y esey ta tremendo”, el a duna di conoce.

   Graciela Cheng a referi na e importancia di documentacion. El a bisa cu esaki ta algo hopi importante pa comunidad pasobra hopi biaha ta haya peticionnan tocante diferente topico y diferente personahe.

   “Ora cu ta pone tur e articulonan hunto ta mas facil pa comunidad por tin acceso na dje. Ta hopi importante pa nos tin e corantnan digital cu e investigadornan of esnan cu ta buscando informacion tin acceso na dje mas lihe posibel”.

   Cheng a indica cu p’esey ta importante pa DIARIO cu ta un corant fisico pa ya caba 45,  pa awo ta digital y cu tin un autorisacion oficial pa pon’e online.

   Di su banda, Sr. Peter Scholing a continua bisando cu esaki sigur ta un ‘milestone’. “Mi ta hopi contento como hefe di e departamento di Digitalisacion di Biblioteca cu aworaki Jossito Mansur a duna permiso pa nos por cuminsa pone DIARIO disponibel online tambe y inclui nan den nos coleccion digital, coleccion.aw, Coleccion Aruba”.

   Ta un proceso cu ta bay tuma su tempo pasobra ta papiando di 45 aña di e corant. Esey kiermen cu un gran parti no ta pertenece na e era digital. “Nos ta bay haci un esfuerso pa tur cos cu ta digital caba ta disponibel mas pronto cu ta posibel. Nos ta bay cuminsa haci esey e siman aki mes.

   Esey ta nifica cu di e 45 añanan na prome instante lo tin 4 pa 5 aña digitalmente disponibel y dentro di e siguiente añanan ta bay traha riba e corantnan cu ta den buki y cu ta mas dificil pa digitalisa. Pero nos ta bay traha riba dje, Scholing a remarca.

   E echo cu e corant ta na Papiamento ta importante pasobra gran parti di e corantnan cu ta disponibel di e era di añanan 70, 80 etc, no ta na Papiamento. Esaki tin un impacto hopi grandi for di e punto di bista cu nos idioma ta e idioma cu ainda e localnan ta prefera lesa y cu ta e idioma cu nos ta orguyoso di dje, el a agrega.

   E acontecimento aki lo habri caminda pa mas informacion, pa un miho servicio di parti di Biblioteca pa e pueblo di Aruba. “Mi ta hopi contento cu e cooperacion di DIARIO, famia Mansur, Sra, Nuhad Mansur cu tambe a duna permiso pa algun aña pasa tin e revista HOLA disponibel.

   Cu esaki awor BNA tin permiso pa digitalisa tur e obranan di Sr. Jossy Mansur, na feliz memoria, di e historia di Aruba, diccionario, pensamento, dicho y proverbio, traduccion di obranan clasico. Ta trata di mas o menos 80 buki di cual tin un trabao hopi grandi pa digitalisa tambe, Peter Scholing a finalisa bisando.