Coreccion riba actividad di Kiwanis Club of San Nicolas
ORANJESTAD (AAN): Recientemente e Directiva nobo di aña 2025-2026 di Kiwanis Club of San Nicolas a sinta, y pesey a tene un ceremonia pa cu cambio di directiva. Na e ocasion aki a manda felicita y gradici e Directiva saliente, y na mesun momento duna bon bini na esun nobo.
Debi na un eror logistico, DIARIO a menciona persona robez como president di e club dinamico aki di San Nicolas. Hecho ta cu e president nobo ta Deborah van den Berg-Alexander. El a haya felicitacion, hunto cu su vice-president nobo, Artaïza Fräser.
Den su mensahe como president nobo, sra. Deborah van den Berg-Alexander a splica cu den e aña nobo aki Kiwanis Club of San Nicolas no ta bay haci cosnan chikito, pero ta hinca tur nan energia bao di e tema #StepItUp.
Sra. Deborah a bisa esey, debi cu liderato no ta djis asunto di titulo, pero mas bien presenta cu accion. E ta pa bo yega na un lugar, y crea un impacto unda cu e ta mas importante, pues cerca e muchanan di mundo.
El a menciona aki ‘comienso nobo, energia nobo, vision nobo’. E ta mira cu hunto cu su poderoso vicepresident Artaïza Fräser, nan ta riba un mision pa kibra tur zona di comfort. Tambe sirbi cu balentia y determinacion. Inspira comunidad pa lidera cu ehempel. Converti e vision den un cambio real. Imagina loke lo socede si henter comunidad dicidi na dal un paso dilanti, anto hunto.
Esaki ta e momento cu transformacion ta wordo produci. Esey ta ora cu luz, oportunidad, y speranza ta extende mas leu cu fronteranan. Pesey awor president Van den Berg-Alexander ta haci yamada na tur hende, sea bo ta miembro di Kiwanis, un amigo di servicio, of djis un hende cu ta kere den poder di comunidad: Uni cu nan. Sea parti di e viahe aki. Sea parti di e impacto.
Esaki ta mas cu un aña nobo di Directiva, esaki ta un movimento. Ban dal un paso dilanti, pa nos destaca, y sirbi cu balentia.
