Minister Geoffrey Wever:
ORANJESTAD (AAN): Manera ja caba ta conoci pa habri un negoshi of haci cambio den e permiso pa negoshi segun ley, mester haci un peticion pa permiso di negoshi via e website di Departamento di Asuntonan Economico, Comercio y Industria (DEACI) y ta wordo otorga bao di responsabilidad di Minister di Asunto Economico.
Den e periodo di juni te cu september a ricibi 872 diferente tipo di peticion. Di e 872 peticion ricibi, 382 peticion a wordo trata y e permiso relevante otorga, 367 peticion ta den tramite, 123 peticion no por a wordo trata pa falta di documento y of pago.
Di e 872 peticion ricibi y e permiso relevante otorga, 237 ta permiso pa negoshi nobo. Di e 237 permiso di negoshi nobo otorga, 22 tawata pa e eenmanszaak, 46 pa filiaal, 166 pa VBA y 3 pa NV. E tipo di actividad comercial pa cual mas permiso nobo a wordo otorga ta actividadnan di Real Estate, compania chiquito di panja, compania di construccion, kapsalon y salon di beyesa y Houdstermaatschappij.
Pa e periodo di januari te cu september, un total di 639 permiso pa negoshi nobo a wordo otorga: 201 den kwartaal 1, 201 den kwartaal 2 y 237 den kwartaal 3 di 2025.
Desde cu na oktober 2022 Minister Geoffrey Wever a introduci e vestigingsbeleid nobo e proceso di otorgacion di permiso a acelera door di elimina diferente rekisito. Tambe digitalisacion di henter e sistema di peticion pa permiso y stimulacion di diferente sectornan economico, inversion den centro di Oranjestad y San Nicolas entre otro a contribui na esaki. Meta di e vestigingsbeleid nobo ta tambe pa emiti permiso den un periodo di dos siman.
Minister Geoffrey Wever ta gradici e team di DEACI pa percura cu e permisonan pa negoshi wordo emiti na forma efficiente y liher. Tambe Minister Wever ta gradici e team di DEACI pa compila tur informacion na un forma continuo riba e proceso di permiso pa negoshi.
Pa ur informacion riba e proceso pa permiso di negoshi ta disponibel riba e website www.deaci.aw
