Banco di Caribe den movecion cu Colegio Nigel Matthew y Aruba Doet 2024

ORANJESTAD (AAN): Riba Diasabra cu a pasa, Banco di Caribe tabata den movimento cu Aruba Doet 2024!

  Un ekipo entusiasma di Banco di Caribe a participa na e accion boluntario mas grandi riba nos isla. Banco di Caribe tin hopi aňa ta participa y e aña aki a duna un man na Colegio Nigel Matthew.  Un team consistiendo di empleado y nan famia a pone man na obra y asina contribui na e proyecto aki.  E team a verf e bañonan, drecha bakinan riba e plenchi di scol y tambe a expande e gazebo.

   E compromiso di Banco di Caribe cu e comunidad Arubano ta consistente. Pa hopi aña caba diferente fundacion y organizacion na Aruba por conta cu nan sosten.

   Aruba Doet un biaha mas a keda organiza pa CEDE Aruba cu sosten di Oranje Fonds. Banco di Caribe ta felicita ambos organizacion cu un exitoso evento na unda henter Aruba a biba cu e accion boluntario riba diabierna y diasabra ultimo.

   Na aña 2021, 2.600 boluntario a participa y a registra 191 proyecto, na 2022 mas di 3.200 boluntario a duna un man na 189 proyecto na Aruba. Na 2023 casi 4.000 boluntario a contribui na 194 proyecto.

  Como instancia comercial, Banco di Caribe ta haya importante pa duna un contribucion pa un miho comunidad. Riba e potretnan por mira Banco di Caribe su team di boluntario y nan famia den accion.