ORANJESTAD (AAN): Wardacosta di Caribe Hulandes ta sigui crece!
Na luna di Februari, seis funcionario a cuminsa cu un curso pa por bay cubri e funcion di Operator na Maritieme Operatie Centrum, conoci como MOC.
E curso aki di 11 siman largo tin como meta, pa familiariza e oficialnan aki cu e habilidad y conocemento esencial den mundo maritimo pa por fungi como operator.
Durante e curso, nan lo bay haya sa di diferente disciplina, manera derecho maritimo, derecho estatal, reglanan di Search and Rescue, ley di awa, ingles, hulandes, comunicacion maritimo, y customer service. Ademas nan lo bay bishita partnernan importante manera CITRO y tambe Servicio Meteorologico, cu kende nan ta colabora estrechamente.
Centro MOC ta forma un parti integral di e Centrro Operacional di Wardacosta y ta fungi como e prome punto di contacto pa e cadenanan local di contacto na Aruba, Bonaire, Curaçao, St. Maarten, Saba, y St. Eustatius, como tambe pa partnernan internacional.
Ademas di nan responsabilidad riba tereno di Search and Rescue, Wardacosta ta mantene vigilancia y ta ehecuta trabao di buskeda den e ambito maritimo. Esaki ta inclui tareanan di control di fronteranan maritimo, vigilancia riba pesca y medio ambiente, y actua como punto di informacion inicial pa Wardacosta. Den colaboracion estrecho cu e tripulacionnan di e unidadnan di Wardacosta, nan ta coordina tur e operacion maritimo.
E crecimento di Wardacosta ta un señal prometedor pa futuro, unda tur e operatornan nobo aki lo bay hunga un rol esencial pa seguridad di operacionnan maritimo y pa cumpli cu e leynan di lama.
