Un lama di misericordia
ORANJESTAD (AAN): Diadomingo dia 7 di april ta wordo celebra e fiesta di Divino Misericordia. Nos Señor a papia cu Santa Faustina riba e proposito especial di e Fiesta aki como un "refugio y proteccion pa tur alma, y specialmente pa e pober pecadornan" cu lo implor'E e dia ey.
Mas aleu El a bisa Santa Faustina, "papia cu henter mundo di Mi incomprendibel Misericordia. E alma cu confesa y ricibi Santa Comunion lo haya pordon total di su pica- y castigonan. Ningun alma mester tin miedo di bini cerca Mi, aunke su picanan ta preto manera carbon.
E fiesta di Misericordia a sali for di profundidad di Mi Misericordia, Mi ta desea cu e lo worde celebra solemnemente e prome Diadomingo despues di Pasco di Resureccion. Humanidad lo no conoce paz te ora cu e bin na e Fuente di Mi Misericordia" - saca for di e Diario di Santa Faustina # 699.
Pa celebra e Fiesta grandi aki apropiadamente nos mester ta bon prepara.
P'esey un cordial invitacion ta bay na Aruba en general y henter pueblo di Dios pa sintonisa Tele Aruba canal 23 dianan 25 y 26 di maart 2024 y 1 y 2 di april 2024, pa 9:00 p.m. (9 or di anochi) pa e siguiente dos programanan: 1e programa (25 di maart 2024 y ripiticion lo ta 1 di april 2024) "Dile a todas las almas acerca de mi misericordia".
"Si bo wak e bunita presentacion aki e ta hiba bo na e centro mes di e mision di Santa Fausina. Bo lo sinti bo conmovi. Esaki ta loke hende mester mira, mester experimenta":Pader Serafin Michalenko, MIC, antiguo Vice-Postulador pa e causa di canonicacion di Santa Faustina Kowalska a bisa.
Seguidamente e di 2 programa lo pasa 26 di maart 2024 y ripiticion lo ta 2 di april 2024 "Divine Mercy Sunday" (na "Youtube" por haye tambe na papiamento bao di e nomber "Lama di Misericordia)".
Hesus a bisa na Santa Faustina cu hopi alma ta bay perdi apesar di Su pasion amargo p'esey El a pidi pa e dia aki cu ta worde celebra e prome Diadomingo despues di Pasco di Resureccion. Hesus a pidi 14 biaha pa duna e dia aki asina hopi importancia. E tema aki a worde presenta door di Seour Gaudia Skass cu ta bini di e mesun Congregacion di Santa Faustina.
Bo por tin un preparacion personal: Ademas di confesa durante Cuaresma, tin hopi otro cosnan cu nos por haci diariamente pa prepara nos mes pa e diadomingo di Misericordia. Akinan ta sigui algun sugerencia:
(*) Sea misericordioso cu otronan pa medio di obranan di misericordia spiritual y corporal (segun nos por);
(*) Reza 3 or di atardi;
(*) Haci Novena continuo na Divino Misericordia;
(*) Scucha/mira video di Divino Misericordia (uza "Youtube");
(*) Lesa e buki Diario di Santa Faustina (por haye na huki di buki na Parokia di Dakota of na Cas di Bijbel band'i Parokia di Playa);
(*) Haci Divino Misericordia conoci - parti "flyers";
- Conta otro di Dios Su Misericordia, si esaki a touch bo persona den bo mesun bida. Confia den Dios Su Misericordia mas hopi ainda. (E no ta laga bo bo so nunca).
