Aworaki a bira cu asegurado di AZV mester mendiga pa servicio di Fisioterapista

Parlamentario Aquannette Gunn, di MAS:

ORANJESTAD (AAN) – Parlamentario Aquannette Gunn, di Fraccion di Partido MAS, den entrevista cu DIARIO a referi na e preocupacion reinante cu tin, ora cu un asegurado di AZV tin mester di servicio di un Fisioterapista.

            Parlamentario Gunn a expresa cu esaki a bira awo un forma cu e pashent tin cu mendiga. El a bisa cu ta conoci caba cu desde aña 2008 caba, na momento cu AZV a cera 28 contrato cu Fisioterapistanan, esaki no a keda amplia pa mas di 15 aña.

            No obstante, e poblacion si a crece y ora cu un docter di cas ta referi un asegurado na un Fisioterapista, ta pasobra berdaderamente e ta rekeri di esaki. Tambe den un postoperatorio tin cu sigui un trayecto di fisioterapia.

            Banda di e cantidad di 28 terapista tin di nan cu ta specializa riba cierto servicio so, unda cu e peso ta bira ainda mas grandi riba e otronan, e Parlamentario a subraya. Esaki ta un tema cu a bin dilanti, y señora Gunn a dirigi diesdos pregunta na Minister di Salud, Dangui Oduber, pa e por trece un solucion.

            El a remarca cu mayoria di e aseguradonan cu ta rekeri un ayudo di fisioterapista ta personanan cu financieramente no por carga esaki. “Kiermen, den nan desesperacion, den nan dolor, nan tin cu cuminza un caminda di cruz pa wak cu cual di esnan cu tin un contrato cu AZV e por haya un alivio.

            E parlamentario a bisa cu hopi biaha, y ta hopi lamentable pa bisa esaki, tin e pensamento cu un persona cu ta rekeri di un servicio di fisioterapista ta “one size for all’. Si pa e dolor cu un pashent tin ta rekeri di 20 sesion, esey no ta e caso di tur pashent, esey ta un caso particular y eynan tambe bo ta sinta riba otro problema “pasobra por a compronde cu cada fisioterapista ta mara na un cantidad di sesion pa aña, y ta keda na nan discrecion con nan ta haci reparticion di esaki”, el a indica.

            E parlamentario a haci e pregunta na e minister pakico AZV no ta traha den corelacion cu su maneho. “Pasobra e maneho di henter gabinete ta cu e ‘e hende ta central’.

            E maneho di minister di salud ta baha, limita, e lista di spera. Pero nos ta practicamente siete aña leu, y practicamente, e situacion na luga di conoce un adelanto nos ta bayendo cada dia mas atras, y sin papia mes di nos adultonan mayor cu hopi biaha ta rekeri di fisioterapia y nan no ta haya ni e chens pa yega akinan”, Aquannette Gunn a remarca.

            E ta haya esaki hopi lamentabel y e ta spera cu e minister di salud por contesta e preguntanan y a base di e contesta cu e ricibi riba esaki su fraccion ta bay haci e peticion tambe pa AZV por bin aden.