Mundo liber por scapa Ucraina despues di fracaso pa scapa Venezuela? --- *Venezuela, Nazi y Rusia ta prueba di concentracion di placa y poder horta --- *Rusia ta duna prueba con comunismo ta uza comercio pa sigui destrui
ORANJESTAD (AAN) — Mas cu un siglo despues cu oficialmente comunismo a haci su entrada na mundo, e mihor sistema cu a wordo inventa pa trapa riba e ser humano, ta bolbe percura pa angustia y miedo pa un guera mundial.
E expansion di comunismo a tuma lugar na diferente forma. Na prome lugar, manera awe ta socede atrobe, pa medio di agresion militar den cual e poder militar di comunismo ta trapa riba libertad nacional di otro pais cu ta wordo anexa manera na 2014 a socede cu Crimea.
Comunismo ta e sistema, cu a haci uzo di lucha continuo di hende pa enfrenta abuso di poder cu ta habri porta pa placa.
Comunismo ta e formula cu ta wordo bende como e democracia perfecto pa asina mata democracia perfecto cu no ta permiti cu un solo grupo ta haci nan mes doño absoluto di hende y ta dicidi cuanto placa cada ciudadano ta haya, kico e ta come y hasta kico e ta papia, con e ta biba y con e mester pone su mes un banda pa sirbi bienestar di su dirigentenan.
E palabra “comunista” ta basa riba e sistema di bida den “commune” cu ta un union di hende (sin necesidad di union familiar) cu ta forma un comunidad cu nan propio leynan y sistemanan.
Durante añanan sesenta, “commune” a bira e forma di bida di entre otro e grupo di hobennan “hippies” cu tabata biba hunto, forma famia segun nan estilo y reglanan sin norma basico.
Den e commune tur hende tabata sirbi otro riba tur tereno, for di relacion sexual cu e commune tabata regla, te produccion di pan pa pone riba mesa.
Aki ta topa cu e forma cu lidernan mas importante di loke a wordo yama “socialismo” (haciendo uzo di e palabra “social”) a abusa di e clase di trahador pa nan yega na rango halto.
Hitler ta un ehempel di un socialista cu a crea un estado Socialista como lider sindical. Su victimanan Hudio, por ehempel, tabata tin circulacion di placa den nan man.
Placa, poder y placer, e aspectonan principal di imperionan grandi den historia a wordo centraliza den comunismo, cu ta opone reglanan convencional y asina a habri porta pa hobennan rebelde pero tambe comerciantenan cu mester sconde nan placa.
Comunismo y socialismo ta basa riba e poder di placa cu ta wordo horta di pueblo, cu cual nan ta cumpra Pueblo, ta yuda crea revolucion pa nan haya poder manera a pasa na Cuba, na Venezuela y te awe na tanto pais den region di Aruba cu ta bira cada rato mas peligroso pa democracia.
Cominismo no conoce ley laboral. E unico ley cu Comunismo conoce ta, cu ta destrui e persona of organisacion cu ta contra estado, cu ta e grupo na mando.
Awe Rusia kier deshaci di e libertad di e pais Ucraina, cu te cu 1991 tabata despues di Russia e estado mas importante di Union Sovietico.
E fantasia di comunismo cu ta wordo bende cu trahadornan pober cu ta kere cu socialismo ta sirbi nan interes, ta spart for di otro pa un motibo.
Rusia, mescos cu tur poder comunista na mundo, a percura di tin placa na cantidad cu no ta bay pa e trahador, pero pa e man yen di hende cu ta dicidi pa ciudadanonan.
Rusia ta doño di petroleo y gas cu e ta bende cu paisnan Europeo na su forma di haci negoshi. E pais cu ta traha na su interes, ta haya miho prijs.
40 porciento di gas cu ta wordo uza na Europa ta wordo produci na Rusia.
Mundo atrobe ta wordo confronta cu su problema grandi ya cu di un banda paisnan liber ta partner comercial di Rusia y na otro banda nan mester lucha pa e supuesto libertad cu ta bay perdi den e concentracion di poder di placa den comunismo.
Pa conclui e analisis aki, mester mira e loke ta pasa na Rusia cu e bril di loke ta pasa na Venezuela, caminda e poder Ruso ta destrui bienestar di e Venezolanonan.
Mundo liber ta “negocia” democracia cu Nicolas Maduro pero na mes momento mester tene nan bienestar comercial na Venezuela na bista.
Pa comprende loke ta pasa na Rusia, mester bisti e bril di e Adolf Hitler, cu a uza socialismo y sindicato como su trapi pa dirigi e pais Socialista Alemania, e regimen Nazi (e partido di obreronan), pa su honor y gloria infernal!
