Aruba awor si a fada cu e di cuatro Blackout di 2022

Diasabra anochi a keda como 3 ora scur

• Companianan a djis keda keto y no a ni divulga algo
• Reaccion tabata hopi extremista for di parti pueblo 

ORANJESTAD (AAN): Te cu Diadomingo anochi 8:00 pm, ainda WEB Aruba NV, y tampoco NV Elmar no a emiti un boletin oficial pa duna splicacion ta kico a causa e anochi cu Aruba y comercio sigur a perde centenares di mil di Florin di entrada.  Danki na un blackout cu a keda registra pa 8:12 pm. riba Diasabra 5 di November 2022.

   E momento ey coriente a fluctua masha mahos mes, caminda coriente di cas a baha for di 127 volt yega abao te na 20 volt, y despues subi bek y hasta yega banda di 130 volt.  Despues el a haya un sorto di resonancia den e coriente, cu varios hende a sinti esaki na nan cas como un sonido raro.  Motornan di compressor di airconan, y tambe motornan di frigidaire a produci sonido raro, y pa ultimo luz a bira hopi cla y despues paga full.

   Henter Aruba a keda den scuridad!  Negoshinan cu tin sistema avanza di UPS cu Backup Generator a cende bek mesora y sigui produci energia pa nan uso.

   Pero Diasabra anochi, na Palm Beach mes ta diferente restaurant grandi a bin descubri cu nan sistema di generator no kier a cende ni pa nada di mundo.

   Turistanan cu net e momento ey tabata comiendo nan cena, a haya nan ta caba esaki trempan, como cu negoshinan a bira calor mesora.  Algun establecimento cu tin mesa cu stul pafo, a sigui sirbi nan te unda cu nan por.

   Riba Irausquin Boulevard mes dilanti Highrise Hotel, por a mira algun negoshi cu diripiente luz ta cende, pero despues di un rato ata coriente ta cay bek.  Managernan a bin realiza cu ta importante pa regularmente haci un check-up cu nan sistema di generator.

   Aeropuerto di Aruba mes tambe a bira scur, net ora cu un avion a caba di subi.  Esnan abordo lo a mira abao con diripiente henter e isla a bira scur ora tur luz a desaparece.

   Mientras tanto, NV Elmar a check nan sistema y realiza mesora cu ta e planta di genera Awa y Electricidad di WEB na Balashi ta esun cu a cay afo.  Mesora tambe tur hefenan grandi a mobiliza rumbo pa e planta, hunto cu diferente ingeniero y experto den e sistema.

   Trece coriente bek: Y el a resulta di ta un anochi largo pa nan!  Aunke tin e Turbina di Gas cu ya nan a cende banda di 9’or di anochi, toch ora cu WEB Aruba NV a cuminza suministra Elmar cu coriente bek pa 9:35 pm pa varios area, diripiente un otro fayo a presenta y pa di 2ndo vez e mesun anochi, otro blackout atrobe.

   E biaha aki si a dura largo!  Algun area a haya coriente bek te banda di 10:35 pm.  Otronan a haya coriente bek pa 10:45.  Algun area a haya coriente bek banda di 11:05 pm.  Pero un area grandi di Sero Blanco a haya coriente bek te 4:00 am, pero esey ta parce di ta un storing causa den sistema di NV Elmar.

   Speculacion pa causa: Atrobe a cuminza specula kico por ta e causa.  Lo ta e sistema di RECIP-IV a presenta cu otro problema inespera?  Prome biaha tabata algo cu tin di haber cu suministro di combustible, y di dos biaha cu e salida di electricidad.  E biaha aki lo ta kico.

   Otronan ta puntra si acaso ta e sistema-automatico di proteccion pa blackout a bolbe faya.  Y publico a cuminza hasta expresa nan disgusto riba Social Media, y ta cuestiona e decision di WEB Aruba NV cu poco dia ey nan a paga e candelanan di nan Boilers pa ultimo biaha den historia.  Nan ta pensa cu si acaso e Boilers tey ainda, nan lo por a evita otro Blackout.

   “Aruba tin asina hopi Molina di Biento na Vader Piet, un monton di Parke Solar rond di e isla, y toch ainda nos ta pasa Diasabra anochi den scuridad?”  Esey y mucho mas por a nota riba Social Media.

   E speranza tey cu lo por bin un splicacion rapido di loke a pasa.  Pueblo cu ta cliente di e companianan aki, merece di haya splicacion pakico nan a keda sin ricibi servicio, y net riba un Diasabra anochi cu tabatin varios actividad.  E ta un berguenza sigur pa turistanan pasa algun ora incomodo, y kizas hasta keda sin come debi cu no por a haya restaurant pa sirbi nan.

   Excusa anterior: E ultimo biaha cu Aruba a pasa den un blackout total, tabata Dialuna 22 di Augustus 2022.  E biaha ey, e director nobo di WEB Aruba NV, esta Alfredo Koolman a sali dilanti y a menciona cu ta diferente factor a contribui net na mal momento y a causa e blackout.  Uno di nan ta cu e semper cumplidor turbina di gas di 23 MW, pues e machine cu pa hopi decada ta e ‘weso di lomba’ di e compania cu ta genera awa y coriente, tabata off-line na Augustus.

   Y e Blackout di 22 di Augustus 2022, a origina mescos cu e Blackout di dos luna prome, esta 9 di Juni 2022.  Tur a origina den e planta di RECIP-IV cu ta esun di mas nobo cu a wordo instala den un edificio full nobo cerca di lama.

   A ser splica, cu WEB Aruba NV a laga investiga e causa di e blackout di 9 di Juni 2022 pa tuma medidanan di coreccion pa evita cu e ta ripiti.  Mesun cos a priminti tambe cu lo haci cu e blackout di 22 di Augustus, pa evita cu e ta ripiti un biaha mas.

   Den esun di 22 di Augustus, a tira culpa tambe cu e coriente genera door di RECIP-IV no tabata pasa den e ‘vangnet’ di e sistema sofistica cu WEB Aruba NV tin den nan Centrale cu ta un sorto di un sistema automatico cu ta regula coriente den micro-seconde pa henter e pais.  E sistema ey suppose di kick-out cualkier mal linea, y asina salba e isla di pasa den un Blackout.

   Algun siman despues, WEB Aruba NV a emiti un boletin cu porfin e sistema di RECIP-IV aki tambe a wordo poni den e sistema automatico.

   E ora ta kico a pasa anto Diasabra anochi?  E lo ta algo atrobe ‘excepcional’ for di punto di bista di WEB Aruba NV of no.

   Lo tin di investiga kico a socede cu a causa e blackout, y despues kico a pone cu e intento di pone coriente bek pa 9:40 pm a bolbe causa un fayo, y kico a stroba NV Elmar di duna coriente na tur esnan riba e substacion di Sero Blanco.