Vocero di AZV, Solange Tchong:
ORANJESTAD (AAN): Solange Tchong di e Departamento di Voorlichting & Communicatie di AZV ta splica cu despues di mas cu un luna di cambio den e lista di remedi AZV ta wak esaki basta positivo.
AZV mester a cumpli cu e ley unda e cambio a tuma lugar y a bin e cambio den cobertura pa loke ta e remedinan cu ta wordo cubri via AZV, a bisa.
Tchong a sigui bisa cu tin un luna y algun dia cu esaki a wordo introduci y e reaccionnan cu nan ta haya diferente. Tin clientenan cu ta bisa cu nan ta compronde y ta di acuerdo cu e hecho cu AZV tin cu reforma pa por garantisa pa futuro generacionnan cu nan si por keda ricibi e cuido medico via AZV.
Pero tambe tin reaccionnan di clientenan cu ta bisa cu nan kier yama of informa cerca AZV pasobra nan no ta compronde pakico riba cierto remedinan nan tin cu paga.
Loke AZV por splica ta cu loke a yuda sigur den e caso aki tabata cu AZV a tene un media tour na unda nan a duna splicacion riba kico ta importante pa tene cuenta cu ne, a señala.
E cambio principal tabata e parti na unda e tin cu paga pa tur loke ta e categorianan di remedi 'over the counter'. Ta papia akinan di remedinan cu ta pa cuido propio, cu generalmente ta pa alivia sintomanan y malesanan di duracion corto, a bisa.
A splica cu esaki ta e grupo di remedi cu ta bay paga p'e pasobra nan ta remedi cu no ta bay haya receta via e docter riba un receipt di e doctor. Doctor lo duna informacion riba e remedi 'over the counter' y cu ta un remedi cu e pashent mes por busca den botica, riba e reki den e tienda y no na e parti di 'recepteur'.
Den e luna aki, den e periodo di 3 di October pa 31 di October, tabata tin 3% di e yamadanan cu a drenta na AZV. A haya un cantidad di yamada di 1473, pero di e cantidad aki, 3% solamente tabata tocante e pregunta riba remedi, a señala.
Segun Solange Tchong, por conclui cu e acogida of e campaña cu AZV a tene tabata positivo. Hopi hende a compronde pakico a haci esaki y ta compronde cu tin un cambio.
A enfatisa cu e cambio no ta solamente pa e cliente. E cambio ta tambe pa e dunadornan di cuido cu tin cu custuma cu un sistema nobo na unda nan tin cu pone e codigo ora cu nan ta haciendo evaluacion di e remedinan.
Hopi importante ta cu e pashent den consulta cu e docter mester por haya sa caba cual remedinan ta wordo cubri via AZV y cual no.
Otro cambio cu tabata tin ta e grupo di remedinan cu ta riba criterio y esaki ta importante pa hende realisa cu ta riba un evaluacion di e doctor. "Doctor lo evalua pa bo si abo ta un persona cu tin un malesa cronico y tambe si bo ta bay haya e remedinan aki cubri via AZV si of no, conforme e lista di remedi cu aworaki tin riba mesa palabra y cu ta aplicabel pa e dunadornan di cuido", Tchong a indica.
Esnan cu tin cualkier inkietud relaciona cu e lista di remedi por comunica cu AZV. Tin e number general: 527-9900 cu por yama pa haci pregunta. Pero si ta bay puntra tocante remedinan tambe tin e lineanan di WhatsApp: 592-5355, 592-5311 y 592-5399 unda cu por manda mensahe of yama.
E personanan cu malesanan cronico specifico manera diabetes, lupus, colesterol, cancer, Parkinson. E tipo di malesanan aki lo haya e remedinan cubri via di AZV, pero mester tene cuenta cu tin un categoria cu doctor por recomenda, como parti di bo plan di tratamento, pero si ta 'over the counter' (sin receta), esey e pashent lo tin cu page p'e, e vocero di AZV a duna di conoce.
