Artista local Anoushca ‘NOUSH’ Jeandor ta lansa videoclip di su tema ‘Al Ritmo de la Vida'

ORANJESTAD (AAN): “Dancing in the sun, on the rhythm of the drums. Bailando al ritmo de la vida, que esta fiesta no termina”

– cu e mensahe positivo aki artista local Anoushca ‘NOUSH’ Jeandor ta habri su produccion pegahoso nobo titula ‘Al Ritmo de la Vida’.

Bao di encargo un biaha mas di Alex Odor, e produccion aki segun NOUSH ta algo “diferente y yena cu ambiente – manera tur hende ta custuma di mi”. Despues di a wordo conseha dor di un fiel fanatico di su musica pa produci algo cu ta trece ‘ambiente’, Al Ritmo de la Vida a nace.

“Sinta den studio cu Alex, nos tabata scucha algun produccion. Manera cu el’a laga mi scucha esaki, el’a val mi op mesora. Mi a bis’e cu nos ta bay yam’e ‘Al Ritmo de la Vida’”, asina NOUSH a splica.

Inspira pa temporada di zomer, futbol y sabor tropical, Al Ritmo de la Vida ta yena cu tononan melodioso, letranan positivo y ritmo pegahoso cu por scucha den e subgenero di “Tropical Dance Pop”.

Cu e idea aki den mente, NOUSH y su team di produccion Skillmatica a filma un videoclip vibrante, energetico y inspirativo.

Un danki ta bay na tur esnan cu a contribui cu e proyecto aki. 

NOUSH

Anoushca ‘NOUSH’ Jeandor ta naci na Aruba. E ta bin di un cuna musical, su tata ta musico conoci Robert Jeandor. Na un edad hoben el’a cuminsa canta den Koor y asina sigui desaroya su mes den area di musica. Despues di esaki el’a ricibi e oportunidad pa canta den casino.

Cu su mesun banda ‘Perfect Sound’ (lansa na 2006), e sa di presenta na diferente hotel, establecimentonan local y tambe fiestanan di famia. Algun aña despues Noush a ser corona Aruba su prome ganador femenino general di Tumba Festival.

Tambe Noush a presenta internacionalmente na Hulanda y tambe Miami, Florida.