ORANEJSTAD (AAN): E ta un informacion cu ta pone tur hende contento! Esey ta cu Agentenan di Viahe di parti zuidoost di Merca,
a viaha pa Aruba y den nan equipahe a trece hopi regalo pa duna muchanan cu ta kedando na Kinderhuis Imeldahof na Aruba.
E agentenan cu a bin bishita Bucuti & Tara a generosamente a trece cinco tas yen di recurso pa Imeldahof
Ta asina cu Aruba Tourism Authority a organiza un bishita di familiarisacion pa agentenan di e region di zuidoost di Merca cu ta siguiendo nan programa pa bira Aruba Certified Travel Agents. Nan bishita di cinco dia ta mehora nan capacidad pa promove y bende Aruba na nan clientenan.
Nan a wordo invita pa come na Elements Restaurant (cu ta keda na Bucuti & Tara Beach Resort) como parti di nan programa educativo na Aruba, e team di maneho y personal tabata encanta pa ricibi cinco tas yena cu materialnan di necesidad y regalo pa e programa Pack For A Purpose, facilita door di e resort pa duna apoyo na Kinderhuis Imeldahof.
Pack For A Purpose ta un organizacion internacional cu tin como su mision pa impacta comunidadnan mundialemente positivamente door di yuda biaheronan cu kier haci un contribucion significativo na e destinacion cu nan ta bishita. E programa a cuminsa cu un ex-juffrouw di scol durante un biahe na Africa. Rebecca Rothney a wak un necesidad pa apoya muchanan local escolar y nan scolnan. Ora el a regresa back for di Africa, el a yena un maleta cu materialnan di scol pa asina trece nan back pa e muchanan cu tabata tin mester di esaki desesperadamente. Desde 2010, e organizacion a logra trece mas cu 141.103 kilo di material y regalo pa muchanan den necesidad na mas cu 60 pais.
Bucuti & Tara Beach Resort ta orguyoso di ta un miembro di Pack For A Purpose desde Augustus 2015 y ta haci donacionnan cu un averahe di 423 kilo pa aña danki na su huespednan, y den e caso aki, e agentenan di biahe.
“Nos curason ta yen di gratitud na e generosidad di e agentenan di biahe pa nan contribucion na nos programa Pack For A Purpose. Na Bucuti & Tara Beach Resort, nos ta simplemente facilitadornan di e gran initiativa aki”, Crescenzia Biemans, PR Manager local di Bucuti & Tara Beach Resort ta conta. “Nos huespednan y e agentenan aki ta merece tur e credito pa nan aporto di materialnan di necesidad y regalo pa e muchanan di Imeldahof”.
