LIMA: Mas y mas bo ta haya informacionnan di casonan di ladronicia insolito cu ta pasando riba e mundo aki. E biaha aki na Peru, un ladron identifica como Pedro Pacheco, a comete kiebro den un cas durante dia cla.
Ora cu e tabata tratando di sali bek di e cas, via e bentananan halto cu ta cerca di dak, diseña pa laga luz drenta e hogar, el a keda pega. E doño di e cas a bin haye asina, y a kita e smartphone for di dje.
Awor e hoben di 26 aña di edad ta buscando forma pa recupera e smartphone, ya cu riba e aparato digital aki e tin tur su Tesis di Arquitectura di Universidad warda, segun e corant ‘El Confidencial’ a raporta.
Pedro Pacheco ta finalizando su estudio na Universidad. E ta biba na Nueva Chimbote, cu ta un ciudad na costa west di Peru. Su version di e caso ta cu e no tabata tratando di comete kiebro, aunke esey ta parce di ta exactamente loke el a haci.
E hoben a sigura cu su smartphone a cay den e cas, y e tabata tratando di recupera esaki.
Te cu awor, no ta conoci kico lo ta e consecuencianan hudicial pa e hoben, ni si e doño di e cas lo bay debolbe su smartphone.
Segun e emisora Radio RSD, e mama di e hoben, esta Juana Mary Moreno a hasta share e video di e ladronicia riba Facebook y a skirbi: “Bisami mi yiu ta kico a faltabo pa bo a bay haci esaki. Mi ta kere cu tin di pensa si esaki a pasa pa bon of pa malo.”
