Arjen Robben lo bay warda su zapatonan di futbol pa semper

ORANJESTAD (AAN): E ex-futbolista internacional di Hulanda, y hungador di Groningen, esta Arjen Robben a anuncia cu e lo bay warda su zapatonan di futbol pa semper, despues di 37 aña ta hungando bala riba veld. 

E ta haci esaki na un forma definitivo, debi na su problemanan fisico.  El a describi e decision aki como uno “dificil, husto, y realistico.”

   Robben a splica riba su Twitter account, cu despues di e ultimo weganan di e temporada el a cuminza train di nobo “pa mantene su curpa den forma fisico,” pero cu su curpa no ta cooperando cune y no ta dune “ningun bon sensacion ni e confianza cu mi mester di dje.”

   E hungador ya caba a anuncia su retiro pa prome biaha na Juli 2019 ora cu e tabata hungando pa Bayern Munchen, pero el a sorprende mundo di futbol ora cu el a anuncia na Juni 2020 cu e ta bolbe cuminza hunga pa e team di FC Groningen, cu ta e team modesto di Prome Division Hulandes den cual el a forma parti.

   No obstante, e problemanan fisico a pone perde casi henter e temporada, pero el a hunga solamente 173 minuut reparti den seis wega, un circunstancia cu Robben a defini como ‘un decepcion’.  Robben a despedi di e fanaticonan di FC Groningen, deseandonan ‘bon salud’, y ‘pa nan tin un temporada tremendo di futbol cu stadionnan yen.”

   E ex-internacional Hulandes, cu a bishita e team uniform oranje na 96 ocasion, y cu tabata sub-campeon den e Mundial di Zuid Africa 2010, ta laga su carera cu un gran logro di a hunga pa clubnan manera PSV Eindhoven, Chelsea, Real Madrid, y Bayern Munchen.

   Arjen Robben a bishita Aruba na numeroso ocasion, incluyendo un bishita na October 2010, unda publico por a acudi na diferente evento pa asina a mire di cerca y hasta combersa cune.

   REACCION DI PUBLICO:

   Segun Robben a bisa, prome cu el a tuma e decision final el a hiba hopi combersacion cu su famia, amigonan, y coach di FC Groningen, esta Danny Buijs, el a yega na e conclusion pa mihor e stop di hunga.

   El a bisa cu su deseo tabata pa despues di e pandemia di Covid-19, cu e por a hunga den stadionnan yena cu fanatico.  E no kiermeen djis p’e mes, sino tambe pa e fanaticonan.

   “Mi a haya masha hopi reaccion caluroso, henter aña, tambe durante e fase unda mi no tabat ahunga hopi.  Mi ta un persona hopi emocional.  Pues no tabata facil pa finalmente trece e noticia tristo aki dilanti.”

   Kico e lo bay haci awor?  El a bisa cu por lo pronto e lo bay “haci absolutamente nada”.

   “Awor mi no ta un futbolista mas di e team, pues awor mi ta bira un fanatico.  Mi no tin ningun plan concreto pa futuro.  Nos ta bay mira kico ta kico.  Como famia nos a bin bek Groningen y esaki ta nos team.  E lazo ey lo keda existi pa semper.  Pero ta bon pa awor por lo pronto tuma tiki distancia,” Arjen Robben a bisa.

   E team di Bayern Munchen a tuma despedida pa di dos biaha di Arjen Robben.  Dos aña pasa nan a haci esey cu un ceremonia riba veld.  E biaha aki ta na un forma virtual digital.  “Esaki lo keda pa semper, Arjen!  Pa semper!”  Esey ta loke e team campeon Aleman a pone riba un potret na Twitter, unda bo ta mira Robben ta anota e goal ganador pa e team den e final di Champions League di 2013 contra Borussia Dortmund, unda nan a gana 2-1.  “Danki pa tur cos, Arjen Robben”.

   Prensa na Alemania tambe a haci e noticia grandi.  Tambe for di Spaña a bin un reaccion.  “Danki pa bo futbol, lo bo keda pa semper parti di e historia di La Liga,” e organizadornan Spaño di Futbol a skirbi, hunto cu un video di Arjen ta anota un goal caracteristico di dje.