Dia 31 di Juli un bario di Colombia lo bay haya coriente despues di 120 aña di scuridad

MARTINETE: Habitantenan di Martinete na municipio di Remolino na departamento di Magdalena, y cu ta keda como 50 km Zuid-Zuidoost di Barranquilla,

ta sperando ancioso caba pa mira con nan pueblo lo wordo ilumina cu luz, y asina porfin un soño di 120 aña ta bira realidad.

   Na luna di Maart cu a pasa, a cuminza cu e trabao di pone palo di luz, y rek wayanan di coriente pa e casnan cu tin.  Te cu awor nan ta 85% cla cu e trabao, y e dianan aki a cuminza ta instala e meternan di coriente na cada cas.  Pa awor ta calcula cu pa fin di luna di Juli 2021 lo keda cla cu tur cos.

   A instala 90 palo pa coriente di tension halto, y 58 palo di tension abao, y ademas di esey como 8,2 kilometer di waya di tension halto, y 1.4 kilometer di waya di tension abao.

   Esaki ta un proyecto cu e compania Air-e y Gobierno Colombiano a traha riba, pa por duna e pueblo aki e servicio importante di coriente.  E contratista principal di e proyecto a mustra cu e trabao tin un balor di 650 miyon Pesos, y e placa a bin di e Fondo di Apoyo Financiero pa suministra coriente na zonanan rural di Colombia.

   Na pueblo di Martinete tin 81 cas, y awor e habitantenan ta wardando hopi ancioso pa e dia tan spera, un momento cu nan tur a soña di dje.  Suministro di Coriente lo wordo inaugura dia 31 di Juli, cu ta e fecha tambe cu e alcalde di municipio Remolino, esta Carlos Vargas ta haci aña tambe.

   E lider di pueblo di Martinete, esta Edgardo Pabon a bisa cu tin hopi alegria cerca su hendenan, y e muchanan ta esnan cu ta mas feliz.  Awor Gobierno di municipio kizas ta yuda pa financia e pueblo pa nan por instala coriente paden di cas tambe.

   E proyecto aki a genera empleo pa e habitantenan tambe, kendenan a haya coverall pa bisti, y safety helm pa pone riba cabez.  Na comienzo a pensa cu e pandemia lo bay stroba tur cos, pero nan a logra supera esey.  Y awor ya nan ta pensando di sigui duna coriente na otro pueblonan na e parti Caribense di Colombia, incluyendo un pueblo cerca di municipio di Plato.

   Martinete ta un pueblo cu ta conta cu 550 habitante.  E hecho cu nan no tin coriente, a stroba e habitantena di cosnan elemental y necesario pa desaroya den sociedad.

   Un fan, televisor, frigidaire, y stoof ta aparatonan cu ta ausente den mayoria cas den e pueblo, como cu esey ta djis algo luhoso pa esnan cu tin un generator poni pafo di nan cas.

   Habitantenan cu no tabatin e privilegionan aki, ta sigui cu e bida tradicional di usa man pa waya cualkier carton pa kita calor, e sefta poni na bentana pa laga sangura pafo, y e icejug pa warda ijs aden, cu tur dia tres compania ta trece for di San Rafael, y cu ta bende nan na 300 peso pa saco.

   Pa haci realidad e soño aki, ta yuda trece progreso y desaroyo pa e region aki, segun e alcalde Carlos Vargas.